Tempotimor (Ermera)-Sesta semana ne’e, organizasaun la’ós governu Knowladge Sector Initiative (KSI) apoiu jeregen litru 15 hamutuk 135 ba to’os-na’in sira iha suku Poetete, postu adminitrativu Ermera no munisípiu Ermera.
Hafoin distribui jeregen sira ne’e, xefi suku Poetete, Felisberto das Neves hatete, apoiu apoiu ne’ebé KSI oferese ne’e liliu ba agrikultór sira, nune’e bele halot fini sira hanesan batar, koto no produtu sira seluk.
“Iha tinan kotuk ha’u husu apoiu ba sira, atu apoiu bidon, maibé tamba kbi’it entaun sira apoiu massa jeregen 15 litru, nune’e bele tulun ona komunidade sira atu halot fini, tamba bainhira laiha fatin ba komunidade sira halot produtu, entaun impaktu tebes ba sira no batar, kotu, fore-rai, hare no forkeli sai fohuk hotu no labele kuda fali iha tinan tuir mai,” dehan nia ba www.tempotimor.com iha sede suku Poetete, Sesta (25/06).
Apoiu refere la’ós ba komunidade hotu iha Poetete, maibé liliu ba sira agrikultór no kada aldeia iha ema na’in lima.
“Apoiu ne’e kada aldeia iha ema na’in lima, tamba ne’e kompostu xefi familia 60 mak hetan ajuda husi KSI no kada ema ida hetan massa jeregen rua, maibé tenki identifika duni ema apoiu agrikultor mak bele simu,” katak nia.
Entertantu agrikultór Agapito Soares sente kontenti tamba liuhusi apoiu ne’e oferese husi Knowladge Sector Initiative.
“Ha’u kontenti tebes tamba bele hetan jeregen rua husi KSI nune’e bele tulun ona ami atu rai fini, nune’e labele sai aat hanesan tinan hira liuba, tamba laiha fatin atu rai, tamba ne’e ha’u apresia no obrigadu ba KSI,”
Entretantu suku Poetete kompostu husi aldeia 12 ho totál populasaun rihun 11.784.(*)
