Tempotimor (Ermera)-Koordenadór partidu Fretilin iha Munisípiu Ermera, atuál deputadu Parlamentu Nasionál (PN) António dos Santos “55” husu Prezidente Autoriedade Munisípiu Ermera (PAME) foun Eujébio Salsinha tenke sai aman ba povu Ermera.
Atuál deputadu ne’e dehan, maske PAME foun mai husi partidu Fretilin, maibé husik ona responsabilidade iha partidu hala’o knaar iha administrasaun públika hodi serví ema hotu ho imparsiál.
“Ha’u husu ba PAME foun labele uza fatin servisu públika ba ko’alia asuntu partidu, karik ita hakarak ko’alia asuntu partidu, tenki ko’alia iha ita-nia sede partidu, tamba iha edifísiu públika ita atu atende povu nune’e labele hamosu krítika no hatudu unidade iha Ermera,” dehan deputadu 55 ba www.tempotimor.com iha salaun parokia Gleno, Kinta (01/07).
Deputadu ne’e mós husu ba entidade hotu iha Ermera atu lalika uza liafuan prezidente autoriedade foun Fretilin nian, maibé prezidente ba povu Ermera hotu.
“Ha’u husu ba ita hotu katak, prezidenti ne’e aman ba Ermera, tamba ne’e lalika uza liafuan aman ba Fretilin no ita hotu hamutuk atu ajuda nia nune’e dezenvolve Ermera ba oin,” katak António.(*)
