Eletrisidade Mate, Komunidade Ermera Deskonfia EDTL

Tempotimor (Ermera)-Komunidade iha Postu-administrativu Ermera Vila, Munisípiu Ermera deskonfia ekipa Eletrisidade Timor-Leste (EDTL) mak hamate ahi.

Tanba ne’e husu ba parte EDTL atu klarifika lolos kona-ba liña eletrisidade ne’ebé mate iha diresaun postu administrativu Ermera.

“Ha’u deskonfia parte EDTL mak taka ami nia ahi diresaun Ermera, tanba durante ne’e ami nia ahi mate, maibé iha Gleno lakan, ne’e dalaruma politik sira nian mak taka fali ami nia ahi, Governu Sentral tenki toma desizaun ba sira, nune’e ba futuru lalika akontese tán”, dehan Komunidade Jacinta Martins ba www.tempotimor.com iha Aldeia Poepun, kuarta (15/06).

Ho kestaun ne’e, Koordenadór EDTL Munisípiu Ermera, Adolfo Inàcio Maia rekoñese lós duni horkalan to’o agora Eletrisidade, maibé la’os iha postu Ermera de’it, inklui mós Letefoho, Hatolia, Atsabe no Railaku vila, tanba impaktu husi udan.

Tanbá ne’e, komunidade nia hanoin deskomfia parte EDTL mak taka Eletrisidade ne’e lalos no sala.

“Ha’u hanoin komunidade sira nia deskomfia ami ne’e lalos, tanbá ami iha ne’e so kontrola de’it problema ne’ebé akontese no ahi nia kargu inuk ne’e iha bekora kamea. Tanbá ne’e daudaun ami esforsu buka hela impaktu husi ahi mate”,dehan nia

Maibé, to’o agora sedauk bele identifika lolos motivu husi ahi mate ne’e, tanbá laiha ekipamentus ida atu identifika lalais, nune’e meius tekniku mak hodi matan la’o ba buka motivu lolos. (*)

Related posts