Komunidade Poetete Kontinua Simu Cesta Bázika

Komunidade Suku Poetete, Poatu Administrativu, Munisipiu Ermera Vila Simu hela ai-han Sesta Bazika, Sesta (16/4).

Tempotimor (Ermera)-Komunidade suku Poetete ne’ebé lokaliza iha postu administrativu Ermera vila, munisípiu Ermera ohin simu ona sesta bazika husi kompañia fornesedór sira.

Komunidade suku refere foin simu hahan cesta bázika tanba iha fulan hira liuba dadus husi aldeia Vila komplikadu nune’e paradu tiha, maibè ohin kompañia Ermera Tuan distribui ona ai-han ba komunidade sira.

Benefisiáriu João Madeira sente kontente, tamba kompañia bele fornese ai-han, mezmu iha hela situasaun serka sanitária.

“Ha’u senti kontente, tamba ha’u hanoin governu osan laiha atu selu kompañia, tamba durante ne’e ami-nia suku paradu tiha, maibé ohin governu liuhusi kompañia fornesedór distribui ona aihan, nune’e bele tulun atu han ba loron balu nian, tamba boot sira nia politika mak estadu emerjénsia hela de’it, halo ami terus tiha maibá agora senti kontenti ona,” Dehan João ba www.tempotimor.com iha sede suku Poetete, Sábdu (17/4).

Enkuantu xefe suku Poetete Felisberto das Neves katak, komunidade ne’ebé ohin simu aihan cesta bázika mak aldeia Gegmara no Urluli ne’ebé ho totál xefe familia 1.311.

“Iha suku Poetete aldeia 12, maibé iha aldeia 5 mak simu ona ai-han iha fulan tolu liuba, hanesan aldeia Tidbesi, Loblala, Liquisi, Urletfoho no Vila, maibé ohin iha tan aldeia rua mak hetan ona cesta bázika nune’e aldeia 7 hetan ona. Maibé aldeia lima seluk mak sei kontinua iha segunda-feira mak hanesan aldeia Poepun, Rematu, Samatrae, Biluli no Taklela,” dehan xefe suku ne’e.

Entretantu suku Poetete ne’ebé kompostu husi aldeia 12 ne’e ho totál populasaun hamutuk rihun 11.784 abitante. (*)

Related posts