La Hetan Direitu ba Pensaun, KKLNME Diálogu ho Veteranu Sira

Veteranu sira simu ekipa KKLN Munisipiu Ermera iha suku Poetete. Ohin (22/07). Foto Tempo Timor

Tempotimor (Ermera)-Haree ba dadus veteranu ne’ebé rejistu iha 2003 to’o 2005 no 2009 ne’ebé seidauk iha rezultadu, mak Konsellu kombatentes Libertasaun Nasionál iha Munisípiu Ermera (KKLNME), halo diálogu ho veteranu sira husi suku hitu iha munisípiu Ermera.

Tuir sekretáriu KKLN-ME, Paulino Monteiro (Maubili) hatete, sensibilizasaun ne’e haree liuba dadus veteranu nian ne’ebé rejistu iha 2003-2005 no 2009 to’o agora sedauk hetan direitu, tanba ne’e estrutura rezisténsia presiza servisu hamutuk.

Read More

“Tamba ne’e ita presiza haree didi’ak dadus sira ne’e, nune’e ba futuru lei labele kondena ita, tamba ne’e polítika veteranu no konsellu nian oinsa mak bele tais ba veterenu hothotu nune’e labele mosu falsifika istória luta funu nian,” dehan Paulino iha sede suku Poetete, Kinta (22/07).

Iha fatin hanesan veteranu Sebastião Lemos husu ba KKLN atu esforsu hodi hakerek istória Ermera nian ho loloos no funu rejiaun 4 nian para jerasaun foun bele hatene.

“To’o agora istória Ermera no rejiaun 4 nian mós ema barak lahatene, ida ne’e problema ho estrutura militar tamba ne’e husu konsellu tenki tau prioridade hodi promove istória rezistensia nian,” dehan Nia.

Entertantu veteranu sira ne’ebé partisipa iha diálogu ne’e mai husi suku Poetete, Liguimea, Estadu, Ponilala, Mertutu, Ramerhei no Humboe.(*)

Related posts