Tempotimor (Ermera)-Ministériu Saúde (MS) liuhusi diresaun nasionál kontrola moras, hala’o distribuisaun aimoruk masal ba estudante Ensinu Báziku Sentrál (EBC) Dona Ana Lemos iha Gleno.
Tuir xefi ofisiál programa ba distribuisaun aimoruk masal Agustinho Morreira katak, objetivu husi distribuisaun aimoruk ne’e atu kontinua fali atividade ne’ebé molok ne’e hala’o ona.
“Ita hala’o ona distribuisaun aimoruk masal iha 2015, entaun faze ikus tenki hala’o iha tinan ne’e. Tanba ne’e ami mai ho ekipa laboratóriu nasionál no edukasaun, ne’ebé ekipa ida halo promosaun kona-ba lumriga no planeamentu depois halo survey hodi hasai ran inklui hala’o teste ba estudante sira nune’e identifika lumbriga nia tolun iha ka lae,” dehan xefi ne’e ba www.tempotimor.com iha EBC Dona Ana Lemos Gleno, Tersa (27/07).
Nia afirma, atividade distribuisaun aimoruk masal ne’e hetan koordenasaun di’ak ho Ministériu Edukasaun no saúde, nune’e manorin sira bele fó advokasia ba estudante sira-nia inan -aman.
“Ami koordena ho ME no MS munisipál, nune’e sira bele fó advokasia ba manorin sira oinsa fó hatene ba estudante sira-nia inan-aman, nune’e oan sira bele partisipa ativu iha atividade ne’e,” nia dehan.
Iha fatin hanesan, sekretáriu EBC Dona Ana Lemos, Agusto de Jesus Martins apresia ba programa MS nian, tanba bele kontrola saúde estudante nian.
“Ha’u kontenti ho programa ne’e, tamba atu bele kontrola estudante sira nune’e evita aan husi moras oioin,” nia dehan.
Enkuantu eskola EBC Dona Ana Lemos iha estudante hamutuk 815, maibé estudante ne’ebé partisipa ba atividade distribuisaun aimoruk masal ne’e hamutuk 400.(*)
