Tinan 19 Komunidade Uma-Ka’in 75 Iha Goulolo La Asesu Bee-Moos

Tempotimor (Ermera)-Mezmu hela loron 14 para Timor-Leste reataura nia independénsia totál ba dala 19, maibé komunidade iha área rurál seidauk sente benefísiu husi ukun aan nian, inklui komunidade uma-ka’in 75 ne’ebé lokaliza iha suku Goulolo, postu administrativu Letefoho, no Munisipiu Ermera.

Relasiona ho situasaun ne’e, komunidade, Apolinário de Jesus hatete, dezde ukun aan to’o agora aldeia Goulolo sedauk asesu ba bee-moos.

“Ha’u senti prekupa tebes tamba durante ne’e, hato’o bebeik ba xefi suku hodi bele hato’o ba governu maibé laiha rezultadu, nune’e difikulta tebes ba ami-nia oan sira nia saúde, tamba governu liuhusi Ministeriu Saùde (MS) katak han tenki mós, fase liman bei-beik, tamba Covid-19, maibé ami bee laiha ne’e oinsa atu halo tuir no bee ne’ebé ami asesu tenki la’o kilometru 3 mak foin hetan bee. Tamba ne’e husu ba governu atu uza OJE 2021 ne’e fó prioridade netik mai ami povu iha aldeia rural,” dehan komunidade Apolinário ba www.tempotimor.com, Kinta (6/5).

Iha fatin ketak, xefi suku Gulolo, João de Deus rekoñese katak, komunidade uma-ka’in 75 husi aldeia Goulolo to’o agora sedauk asesu ba bee-moos.

Nia mós dehan, nu’udar autoridade prekupa tebes, nune’e hato’o ona proposta bei-beik ba governu liuhusi Agua no Saneamentu Munisípiu Ermera, maibé sedauk iha resposta.

“Alende bee-moos komunidade aldeia Goulolo seidauk asesu ba liña eletrisidade, maibé iha 2020 ha’u ba tuir reunian iha Dili, Ministru Obras Públika (MOP) halo intervensaun fó sai mós aldeia rua ne’e tuir planu Orsamentu Jerál Estadu (OJE) 2021 sei instala liña elitrisidade,” dehan Nia.

Enkuantu suku Goulolo kompostu husi aldeia haat hanesan Goulala, Beturema, Gulolo no Kaibuti ne’ebé ho tòtal populasaun rihun 1.850.(*)

Related posts