Tempotimor (Ermera)-Komunidade uma-ka’in 24 iha Suku Launa Postu administrativu Letefoho, Munisípiu Ermera ne’ebé afetadu ba desastre naturias seidauk hetan ajudus husi governu.
Liga ba situasaun ne’e, xefe suku Launa, Miguel Gomes Maia hateten, komunidade sira ne’ebé vítima ba dezastre naturais iha suku Lauana seidauk hetan apoiu husi governu, tanba dadus seidauk rejistu iha sede suku.
“Ami seidauk bele haruka dadus ba diresaun nasionál dezastre naturais nian, tamba tinan hira liuba ami hato’o bebeik relatóriu ba parte relavante maibe laiha atensaun ka responde ba prekupasaun ne’ebè komunidade enfrenta,” dehan Miguel liuhusi via telefone ba www.tempotimor.com, Kinta (22/4).
Xefe suku ne’e mós dehan, alende problema desatre naturais, suku Launa mós iha aldeia Raebu Soloi mós sedauk asesu ba liña eletrisidade, maske governu no kompañia Devita Unip, Lda harii ona riin eletrisidade no instala ona fiu sira iha tinan 2016.
“Husu ba governu liliu parte relevante ne’ebé responsabliza ba eletrisidade tenki esforsu aan nune’e bele kontinua instala lalais fiu ba komunidade nia uma, tamba komunidade sempre hato’o mai autoridade lokal kona-ba liña eletrisidade,” dehan Nia
Entretantu suku Lauana kompostu husi aldeia 10, mak hanesan aldeia Gruto, Tirlelo, Leobata, Liminui, Abasai, Liabe, Hatugeo, Limilohi, Raebou, Ainapa no Raebu Soloi ne’ebé ho tòtal populasaun rihun 3.336. (*)
