Tempotimor (Ermera)-International Organization for Migration (IOM) servisu hamutuk ho sentru saúde komunitáriu Ermera hodi fó tratamentu saúde gatuita ba komunidade suku Talimoro postu administrativu Ermera no munisípiu Ermera.
Xefi aldeia Marcos Martins hatete, konsulta ne’ebé IOM fasilita ne’e voluntáriu, tanba atu kontrola no leno komunidade sira ne’ebé iha moras. Nune’e faze tuir mai bele hetan tratamentu kuandu iha moras, tanba ne’e kontente ho prezensa IOM nian.
“Ami kontente tebes ho presenza IOM nian, tanba bele mai iha ami-nia suku, nune’e bele fó tratamentu gratuita, tanba bainhira atu leno ba iha isin lolon ne’e tenki selu, maibé iha klínika privadu sira mak iha. Tanba konsulta ida leno importante tebes, nune’e bele hatene moras ne’ebé iha laran no ita rasik bele haree diretamente iha komputadór bainhira iha moras,” dehan Marcos ba www.tempotimor.com iha suku Talimoro, Kuarta (09/06).
Iha fatin hanesan komunidade Joaquim Soares agradese ba IOM, tanba fó tratamentu di’ak tebes ba komunidade sira.
“Kontenti tebes no obrigadu barak ba IOM tanba bele mai fó konsulta no ba dalauluk ha’u foin haree loos programa ida ne’e, tanba ekipamentus ne’e bele deskobre, bainhira moras ruma iha laran,” dehan Nia.
Joaquim mós husu ba governu atu prepara ekipamentu leno isin lolon iha sentru saúde sira, nune’e bele fó tratamentu ba komunidade sira bainhira iha moras laran.
Entretantu komunidade sira ne’ebé partisipa iha tratamentu saúde gratuita ne’ebé fasilita husi IOM ne’e la’ós de’it komunidade Talimoro maibé komunidade husi suku seluk mós hola parte hotu.(*)
