Tempotimor (Ermera)-Cooperativa Café Timor (CCT) apoiu karreta baskolante 10 ba voluntáriu sira ne’ebé dadaun ne’e reabilita hela estrada diresaun postu administrativu Letefoho munisípiu Ermera.
Tuir Administradór Letefoho Julião Marito de Deus, objetivu husi apoiu karreta sanulu ne’e atu ajuda servisu voluntáriu sira ne’ebé hadi’a hela estrada ligasaun ba postu Letefoho ne’ebé aat dezde ukun-aan to’o agora.
“Estrada ne’e aat dezde ukun-aan to’o agora, maibé laiha atensaun ruma husi governu mezmu ami hatoo bebeik. entaun ami husu apoiu ba iha Cooperativa Café Timor (CCT), nune’e iha duni rezultadu hodi apoiu ba hadi’a estrada diresaun kailiti ba postu Letefoho ho distánsia kilometru lima,” dehan administradór Julião ba www.tempotimor.com, Sábadu (29/5).
Administradór ne’e mós agradese ba CCT Ermera, tanba bele fasilita ona karreta ba servisu voluntáriu sira hodi halo reabilitasaun ba estrada sira ne’ebé aat.
“Ha’u apresia tebes ba apoiu ne’ebé CCT fasilita, tamba ami-nia estrada ne’e durante ne’e laiha apoiu ruma husi governu no parte seluk, maibé ho grasa Maromak nian ba dahuluk ohin CCT apoiu no kontribui voluntáriu hodi hadi’a ami-nia estrada, tamba durante ne’e difikulta no ameasa tebes ami no komunidade bainhira halo movimentu,” Katak nia.
Iha fatin hanesan xefi supervizór CCT Ermera, Helder Salsinha Trindade katak, apoiu ne’e nu’udar kontribuisaun voluntáriu ba desnvolvimentu, tanba atu evita risku sirkulasaun movimentu transporte nian.
“Ami-nia apoiu ne’e atu evita risku ba sirkulasaun movimentu transporte nian, tamba haree ba estrada ne’ebé aat,” dehan nia,
Enkuantu iha servisu reabilita estrada diresaun postu administrativu Letefoho ne’e CCT fasilita kareta baskolante sanulu hodi tula fatuk no raihenek para ateru ba estrada ne’ebé aat.(*)
