Tempotimor (Ermera)-Relasiona ho udan no anin boot ne’ebé akontese iha loron 4 abril fulan kotuk, maka rezulta rai monu, estrada públiku balun hetan estragus inklui ponte sira hetan sobu tanba korente bee no udan ne’ebé maka’as.
Liga ba situasaun ne’e, Obras públiku munisípiu Ermera rekolla ona dadus hamutuk 41 ne’ebé submete ona ba Ministériu Obras Públika (MOP) iha nasionál.
Diretór Obras Públika (MOP) Munisípiu Ermera, Armindo Soares hatete, dadus ne’ebé iha mak kona-ba estrada públiku ne’ebé liga postu administrativu Railaku ba Gleno no husi Gleno ba postu Letefoho, Atsabe, Hatoli B no Ermera vila inklui ponte balun ne’ebé hetan estragus husi mota.
“Diresaun husi postu railaku mai Gleno no ba postu haat seluk iha estrada nakfera no ameasa estrada kotu hamutuk 38, maibé kona-ba korente mota estraga ponte tolu, ponte ida iha postu Atsabe, ida iha Gleno no ida seluk iha Ermera vila, inklui rai monu hodi taka estrada,” dehan Diretór Armindo ba www.tempotimor.com, Domingu (2/5).
Husi dadus sira ne’e haruka ona ba nasionál oinsa bele haree iha tempu besik atu haruka ekipa sira hodi halo servisu.
“Ha’u ho ekipa sira ba iha baze atu foti dadus kona-ba postu ne’eba afeita ba inundasaun no dezastre naturais liliu estrada públiku ne’ebé hetan estragus. Tanba ne’e dadus sira ne’e hodi relata ba Prezidente Autoriedade Munisípiu Ermera (PAME) hodi enkamiña ba MOP nasionál hodi implementa programa ne’ebé iha hodi hadi’a infrastrura ne’ebé hetan estragus,” katak nia.
Nia reforsa, dezastre naturais hotu la espera tanba ne’e, governu mós presiza haree no estuda ba situasaun ne’e atu oinsa bele rezolve. (*)
