Tempotimor (Ermera)-Relasiona ho desizaun governu daualu ne’ebé hili munisípiu Aileu hodi estabelese sidade universitáriu no okupa propriedade komunidade agrikultór nian, mak Uniaun Agrikultór Ermera (UNAER) prontu fó apoiu solidaridade ba komunidade suku Mantane, munisípiu Aileu.
Tuir prezidente UNAER, Carlos Sarmento katak, UNAER kontinua luta defende komunidade ba desenvolvimentu agrikultura sustentável, tamba fatin refere la merese ba harii universidade.
“Fatin ne’e potensiál tebes ba agrikultura, tamba ne’e husu ba governu tenki haree no tetu didi’ak mak foti desizaun tamba ita maioria ka bele dehan 85% moris hanesan agrikultór no mai husi rai ne’ebé iha no fó susar ba agrikultór sira,” dehan Prezidente UNEAR ne’e ba www.tempotimor.com liuhusi konferénsia imprensa iha Maudio Gleno, Tersa (13/07).
Alend ne’e, Joanico de Deus Soares nuudar mós portavóz ba konferénsia imprensa ne’e husu ba governu halo hola desizaun ne’ebé dignu ba povu to’os na’in sira.
“Husu governu bainhira foti desizaun tenki konsulta didi’ak ho komunidade nune’e sira mós moris ho dignu, tamba fatin ne’e potensiál liu ba agrikultura, nune’e bele halo produsaun agrikula hodi bele asesu iha merkadoria hodi hetan rendimentu moris familia nian liuhusi produtu ne’ebé iha no ami-nia apoiu ne’e koletiva. Nune’e luta kontra desizaun ne’ebé fó impaktu negativu ba agrikultór sira,” Nia dehan.
Entretantu, kona-ba estabelesimentu sidade universitáriu iha munisípiu Aileu, governu liuhusi Ministériu Ensinu Superiór Siénsia no Kultura (MESSK) rekolla ona dadus husi komunidade afetadu sira katak, governu sei halo indeminizasaun ba komunidade afetadu sira hamutuk millaun $2.1.(*)
