Tempotimor (Ermera)-Tuir Administradór Postu Administrativu Atsabe, Manuel Soares Araújo husu ba governu atu harii sentru saúde komunitáriu iha postu Atsabe, tanba komesa ukun-ann to’o agora komunidade Atsabe sedauk asesu ba saúde ho di’ak.
“Ha’u husu ba oitavu governu se bele tau asuntu prioridade mai ami-nia suku lima ne’ebé dezde ukun-aan to’o agora sedauk asesu ba saúde ho di’ak, maske hato’o bebeik. Tamba ne’e husu governu tenki harii saúde komunitáriu iha ami nia suku, nune’e faselita komunidade sira atu halo tratamentu ba saúde ne’ebé besik,” katak Administradór Manuel ba www.tempotimor.com liuhusi via telefone, Ohin (13/07).
Administradór ne’e afirma, durante ne’e komunidade sira tenke ba iha postu no ba suku seluk ne’ebé iha ona sentru saúde komunitáriu ho distansiamentu dook.
Suku sira ne’ebé too agora seidaukmasesu ba sentru saúde komunitáriu mak hanesan, suku Obulo, Batumanu, Tiarlelo, Laklo no Baubau-kraik.
Alende ne’e nia mós dehan, komunidade 36 mak iha postu Atsabe sei sai vensedór ba programa Uma Kbiit Laek (UKL) ne’ebé governu impementa ona liuhusi Programa Nasionál ba Dezenvolvimentu Suku (PNDS).
“Ami iha komunidade kbiit laek 36 mak benefisia ba UKL, maibé agora sei iha prosesu kotasaun, nune’e ekipa PNDS daudaun ne’e hala’o konsilidasaun iha suku hodi prepara kotasaun ba kompañia ne’ebé hetan fiar husi governu atu halo konstrusaun uma ba ema ne’ebé kbiit laek, tamba ne’e komunidade sira agora hein hela programa governu nian,” nia dehan.
Entretantu postu Atsabe, munisípiu Ermera kompostu suku 12 ho nia aldeia 59 ne’ebé ho totál populasaun rihun 25.196 no xefi familia rihun 5.299.(*)
