Tempotimor (Ermera)-Prezidente Autoriedade Munisípiu Ermera (PAME) Eujebio Salsinha husu ba autoriedade munisípiu Ermera atu prepara planu di’ak nune’e prevé orsamentu ba programa igualidade jéneru iha munisípiu Ermera, liu-liu ba área rurál sira.
Prezidente autoridade ne’e dehan, programa refere prioridade, tanba ne’e halibur rekursu hothotu iha Ermera liliu sira ne’ebé iha area rurál hodi asesu informasaun igualidade jéneru.
“Programa ne’e importante tebes, nune’e ha’u husu komisaun organizadora se bele ajusta orsamentu ne’ebé adekuadu, nune’e atividade bele kobre iha área hotu liliu área rurál, nune’e ema hotu iha koñesimentu kle’an ba progrma implementasaun igualidade jéneru ne’e,” dehan PA Eujebio ba www.tempotimor.com iha salaun agrikultura Fatkeru Gleno, Kuarta (07/07).
Nia dehan, ajustamentu orsamentu refere sei fó atensaun liu ba feto potensiál sira ne’ebé iha área remotas.
“Ha’u iha espetativa katak, feto sira ne’ebé iha kapasidade sufisiente. Nune’e bele tau hanoin hamutuk ba setór dezenvolvimentu liliu ba área igualidade jéneru bele sai di’ak liu no susesu. Tamba ne’e feto sira labele hein de’it oriemtasaun, maibé sira mós iha motivasaun rasik oinsá bele inspira feto maluk sira ne’ebé iha área rurál hodi partisipa iha kualker atividade,” nia tenik.
Iha fatin hanesan, Diretór Jerál Administrasaun Finansas, Ministériu Administrasaun Estatál (MAE), Agostu da Costa hatete, atu dezenvolve Ermera presiza mós partisipasaun feto nian, nune’e bele foti desisaun ruma ne’ebé kontribui ba dezenvolvimentu.
“Ha’u husu ita hotu liliu ba inan-feton sira bele prepara aan atu simu delegasaun husi dekretu lei númeru 3/2016, nune’e liga ba asuntu programa igualidade jeneru hodi promove feto rurál,” katak Nia.
Enkuantu atividade sorumutu ne’e sei hala’o durante loron tolu, ne’ebé hahú husi 07 to’o 09 jullu 2021.(*)
