Tempotimor (Ermera)-Atu dezenvolve familia ida ba familia wa’in, presija iha komitmentu no tane aas valór umanu nian hanesan alvú ba makaer ukun sira.
Husi sikun libertasaun povu no nasaun iha okupasaun sira liman, Eujebio Salsinha hamutuk ho nia maluk sira ne’ebé balun hela ho memória no balun iha hela situasaun triste nia laran, luta ona ba ukun-rasik aan, maibé oan mane mesak ne’e kontinua haree ba futuru povu Ermera nian iha tempu ukun rasik aan.
Eujebio Salsinha moris iha suku Mertutu, postu administrativu Ermera, munisípiu Ermera iha loron 25 janeiru 1962, oan husi Miguel Salsinha (matebian) no Maria Zelia Ximens (matebian).
Tuir Eujebio, nia pai nu’udar Vise Sekretáriu Komite Rejionál Fretilin Ermera nian iha 1975, maibé iha 1 Setembru 1975 hetan torturasaun no oho husi UDT sira iha Aifu suku Poetete no nia mãe mate iha loron 27 setembru tinan 2010.
Entretantu iha 1968 Eujebio Salsinha hahú eskola iha EBC Maskulina Misaun Ermera no remata eskola primária iha eskola públiku munisípal nú. 6 Ermera iha 1972. Depois iha 1972-1975 kontinia eskola iha Dili no kompleta terseira klase portugues, maibé mosu golpe iha 1975 no Fretilin kontrola ona teritóriu nasional, entaun nia deside fila ba Ermera hamutuk ho forsa no akompaña husi Domingus Lay ho João Baltizar Salsinha iha 27 setembru 1975.
Iha 1977 asume knaar hanesan mestri hodi hanorin eskola iha suku Estadu no Ramerhei no iha 1977-1980 kontinua hanorin iha eskola SD Pansasila Ermera Vila depois iha 1980-1983 kontinua hanorin iha Humboe, iha 1983-1984 kontinua hanorin iha eskola Hati-Kudus Bekora-Dili no iha 1984-1993 kontiniu hanorin iha eskola Nuntali Ermera no asume knaar mós nu’udar ajensia planeamentu Ermera.
Alende ne’e husi servisu sira ne’e, iha 2003-2007 Eujebio Salsinha mós asume knaar nu’udar xefi gabinete ba Ministru Interiór no iha 2007-2017 asume nafatin knaar nu’udar xefi gabineti Ministru Defesa no Seguransa (MDS) nian depois iha 2020-2021 servisu iha xefi gabinete Ministru Administrasaun Estatál (MAE).
Entretantu iha 2004 mane mesak ne’e fihir nia aifunan domin Geonaveva da Costa Martins ne’ebé molok ne’e asume mós responsabilidade iha uma fukun Parlamentu Nasionál (PN) iha lejislatura dahuluk no deputada partidu Fretilin.
Nune’e, Eujebio Salsinha deside hodi kaben Geonaveva da Costa Martins, no sira iha oan na’in nee ne’ebé kompostu feto na’in rua no mane na’in haat.
Hafoin tama iha 2021, bainhira mandatu Prezidente Autoriedade sesante sira-nia manatu atu remata ona, Eujebio mós iha korajem hodi kandidata aan, tanba haree ba povu Ermera ne’ebé to’o agora seidauk sente loloos ukun-aan. Maibé sai duni realidade nune’e iha loron 1 Jullu 2021, hetan pose hanesan Prezidente Autoriedade Munisípiu Ermera (PAME) ba tinan lima husi Minsitru Administrasaun Estatál (MAE), Miguel Perreira de Carvalho iha Gleno.
“Tamba atu fó kontribiisaun ba Ermera mak nune’e motiva ha’u atu konkore, oinsá fó mós kontribiisaun ne’ebé válidu no justa liuhusi mandatu ne’ebé iha, tamba ema laiha vontade atu dezenvolve Ermera. Nune’e ha’u deside mai oinsa kordena ho entidade hotu inklui autoridade oinsa hodi progresu moris di’ak ba povu durante mandatu, no sei fó prioridade liliu ba kondisaun povu nian ho dignu hanesan ema ne’ebé moris iha ambiente independente,” dehan nia ba www.tempotimor.com iha nia knaar fatin Gleno, Kinta (08/07).
Enkuatu PAME atuál kompleta ona tinan 59 nu’udar mós veteranu ida ne’ebé partisipa iha luta ba TL nia auto-determinasaun ho partisipasaun 8/14. No hetan ona kondekorasaun husi estadu Timor-Leste ho medalla Orden Nicolau Lobato no Ordem Estadu TL.(*)
