Tempotimor (Ermera)-Komunidade suku Talimoro ne’ebé lokaliza iha postu administrative Ermara, munisípiu Ermera simu ona ai-han Cesta Bázika husi govenru daualu, maski komunidade sira hein to’o tinan.
Turi xefe suku Talimoro, Luis dos Santos katak, komuniadde sira suku Talimoro rasik hamutuk rihun 4.285 mak simu ona ai-han cesta bázika ne’ebé governu promete.
“Komunidade hamutuk rihun 4.285 mak hetan ona ai-han ne’ebé husi kompañia Betuhei, Lda ne’ebé sai hanesan distribuidór ai-han, maibè iha komunidade uma-ka’in 15 mak naran latama iha lista benefisáriu, maibé ami foti ona sira-nia dadus hodi submete ba iha postu nune’e bele haruka ba iha Ministériu Administrasaun Estatál (MAE), nune’e sira bele simu iha faze tuir mai,” dehan nia ba www.tempotimor.com iha suku Talimoro, Kuara (3/6).
Iha fatin hanesan, benefisíariu Alberto Soares senti kontente, liga ho ai-han ne’ebé kompañia distribui ona ba sira.
“Ha’u kontente tebes no agradese ba kompañia, tanba bele tulun ona ami liuhusi programa governu nian, oinsa fasilita cesta bázika tuir promesa ne’ebé iha,” katak Nia.
Enkuantu suku Talimoro kompostu husi aldeia Bura, Liberti, Lima-mesak, Nunusua no Moris foun, ne’ebé iha nia komunidade rihun 4.300 no xefi familia hamutuk 718.(*)
