Tempotimor (Ermera)-Kinta (03/06) ne’e Rede Reabilitasaun Baze Komunidade iha Timor-Leste (CBRN-TL), fasilita formasaun ba jornalista destakamentu sira iha munisípiu Ermera.
Iha formasaun ba jornalista sira ne’e diretora CBRN-TL Norberta Soares, foka liu ba oinsa kontribuisaun mídia nian atu servisu iha komunidade ho inkluzivu liliu ba feto no labarik ne’ebé difisiénte.
“Husu ba jornalista sira tenki tau importante mós ba asuntu difisiénte iha servisu kobertura, tamba dala barak mídia ladún fó importánsia ba difisiénte. Tanba ne’e programa ne’ebé ami hala’o liuhusi Spotlight haree liu kona-ba oinsa halakon diskriminasaun hasoru feto no labarik ne’ebé defisiénte,” dehan nia ba www.tempotimor.com iha edifísiu rádio komunidade kafé Gleno, Kinta (03/06).
Iha fatin hanesan jornalista Rádiu Komunidade Kafé Ermera apresia tebes ba formasaun ne’e tanba bele kapasita liután servisu jornalista oinsa fó prioridade ba ema ho difisiénte sira.
“Ha’u apresia tebes ba formasaun ne’ebé fasilita mai ami, nune’e bele hafanu ami oinsa bele prepara planu kobertura ba iha asuntu difisiénte atu nune’e bele kontribui no partilla informasaun ba komunidade atu hatene hodi labele halo diferénsia ema ho kondisaun defesiénsia,” katak nia.
Enkuantu pertisipante sira ne’ebé hola parte iha formasaun ne’e, kompostu husi jornalsita Rádiu Komunidade Kafé Ermera (RCCE) na’in rua, jornalista destakadu husi Rádiu no Televizaun Timor-Leste Empreza Públika (RTTL,EP) na’in ida, jornalista www.tempotimor.com na’in ida inklui juventude na’in neen.(*)
