Tempotimor (Ermera)-Hafoin Ministériu Saúde (MS) no Sala Situasaun Sentru Integradu Jesatun Krize (SS-SIJK) hola desizaun hodi transporta pasiénte Covid-19 ba halo izolamentu iha kapitál Dili, mak Diretór Servisu Saúde Munisípiu Ermera (DSSME), Antonio de Deus Fatima hetan pankada husi familia pasiénte sira.
Diretór ne’e dehan, pasiénte Covid-19 na’in 58 mak detekta iha postu administrativu Railaku Munisípiu Ermera no lori ona ba Dili hodi halo izolamentu.
“Horseik ami transporta pasiénte Covid-19 hamutuk 58 ba izolamentu tasi-tolu tamba ita-nia fatin la sufisiente, depois ami fila mai ha’u rai tiha kareta iha kantor depois atu fila ba uma mak suspetu mane na’in rua mai husu ha’u tanbasa mak ita boot foti desizaun tenki haruka ami-nia alin feto ne’ebé tinan sei kiik seidauk bele hatene halo buat ruma tenki ba Dili? ne’ebé ha’u hatán ba sira katak ne’e desizaun nível altu husi Ministériu Saúde ho Sentru Jestaun Krize la’ós kompeténsia ami-nian, maibé sira nafatin insulta ha’u ho liafuan tolok,” dehan Diretór ne’e ba www.tempotimor.com liuhusi konferensia imprensa, Segunda (02/08).
Nia esplika, “Sira na’in rua tuku ha’u dala rua iha hirus matan, sorti tia na’in rua iha selae ha’u bele hetan pankada todan tamba ne’e tenki prosesu ba oin,” katak Nia.
Entertantu familia vítima, Luis Alves Tilman senti triste ho aktu ne’e, nune’e husu ba parte seguransa tenki prosesu tuir dalan legál.
“Husu ba autoridade seguransa tenki haree didi’ak asuntu ne’e, karik la garantia seguransa ba saúde maka ba futuru Covid-19 kontinua da’et iha Ermera, tamba ne’e husu ba seguransa tenki prosesu ema kriminozu ne’e,” nia dehan.
Entertantu komanante PNTL munisípiu Ermera Ludgerio Lay katak, parte suspeitu sira asegura ona husi seguransa baihira kazu ne’e akontese.
“Seguransa iha kalan ne’e kedas kaptura suspeitu mane ida ho naran inisial OM tanba ne’e iha hela prosesu investigasaun. Depois kona-ba investigasaun ne’e segredu justisa, tanba ne’e hein de’it,” nia dehan.
Enkuantu akontesementu refere akontese iha iha (01/08/2021) kalan maizumenus tuku 11:00 otl iha bairu Lahane Gleno.
Entertantu ba daudaun ne’e kazu Covid-19 iha munisípiu Ermera hamutuk 474, ne’ebé na’in 79 iha isolamentu tasi-tolu no 28 iha izolmentu Gleno no 367 halo auto-izolamentu iha ida-idak nia uma.(*)
