Tempotimor (Ermera)-Haree ba realidade ne’ebé foin sa’e barak mak involve aan iha konsumu tabaku inklui alkohol, mak Ministériu Saúde (MS) liuhusi saúde Munisípiu Ermera sensibiliza informasaun ba joven sira kona-ba impaktu husi konsumu tabaku.
Iha sensibilizasaun ne’e ne’e, xefi departamentu programa de saúde munisípiu Ermera, Grasiano da Costa da Cruz hatete, sensibilizasaun ne’e importante liuba joven sira oinsá evita-aan husi konsumu tabaku, tanba fó impaktu ladi’ak ba saúde liliu pulmaun inklui moras seluk tan.
“Ha’u husu ba juventude sira presiza evita aan husi konsumu tanbaku, tamba sira mak futuru nasaun no nu’udar autór oinsá hatutan tan informasaun ba joven sira iha área rurais ne’ebé laiha opurtunidade atu partisipa,” dehan Grasiano ba www.tempotimor.com iha uma Dame Gleno, Sesta (23/07).
Iha fatin hanesan, Izaquel da Conçeicão nu’udar partisipante senti kontente tanba bele partisipa iha programa sensibilizasaun refere.
“Ha’u kontenti tamba programa ne’e di’ak ba juventude sira oinsá hamenus fuma tabaku, nune’e evita aan husi moras ne’ebé bele afeta ba ita-nia saúde liliu pulmaun. Entaun husi informasaun ne’e eduka ami oinsá fó hatene ba maluk joven seluk oinsá atu evita fuma tabaku,” nia dehan.
Enkuantu tuir dadus Global YouthTabaco Survey tinan 2019 hatudu katak labarik iha Timor-Leste ho idade 13-15 pursentu 30% mak konsumu tabaku (fuma sigaru) liu-liu estudante. Alende ne’e tuir dadus husi MS mós hatud katak, ema ho idade 20 ba leten pursentu 71% mak ativu konsumu tabaku inklui dadus husi Organizasaun Mundiál ba Saúde (OMS) hatudu katak, kada tinan rezulta fumadór hamutuk rihun 600.000 mak mate.(*)
