Selebra Festa Kristu Liurai, Amo Élio Husu Autoridade Letefoho Ukun ho Domin

Sarani lubun bo'ot nadodon ba partisipa misa Kristu Liurai iha Letefoho, Ermera (22/11). Foto Tempo Timor
Sarani lubun bo'ot nadodon ba partisipa misa Kristu Liurai iha Letefoho, Ermera (22/11). Foto Tempo Timor

Tempotimor (Letefoho)- Ohin loron hanesan loron Domingu baibain ba dala ikus nian iha kalendáriu litúrjika Igreja Katólika nian no Igreja komemora festa Kristu Liurai mundu rai kalaran nian ho nia leitura sira mak hanesan Ez 34,11-12.15-17 1Cor 15,20-26a.28 Mt 25,31-46.

Iha festa Kristu Liurai nian ne’ebé hala’o iha kampaun Kristu Liurai Letefoho, selebrante pároku Parókia Nossa Senhora do Carmo, Padre Élio Perreira Fernandes husu autoridade sira, atu ukun povu Letefoho ho domin no responsabilidade.

Padre Élio husu ne’e ho símbolu tara tais ba autoridade postu administrativu, hamutuk ho premiadu Nobel da Pás José Manuel Ramos Horta, no autoridade lokál sira husi suku ualu iha misa nia klaran.

Iha omilia, Padre Élio fó hanoin katak, símbolu tara tais ne’e atu fó korajen ba sira ne’ebé iha autoridade tenke servi povu ho loloos tuir deit Maromak nia hakarak.

Ho Tais ne’ebe tara ba ukun na’in sira, Padre Élio husu atu ukun ho didi’ak, ukun ho responsabilidade, ukun ho domin, ukun atu salva rai no povu ida ne’e husi injustisa, no kuda domin no dame.

“Ohin ita komemora festa Kristu Liurai, ita hetan mós inspirasaun husi livru profeta Ezequel nian, ne’ebé dehan katak, Maromak diretamente bali nia povu, hateten,Ha’u mak sei tau matan, ha’u mak sei hare, ha’u mak sei sai hanesan bibi atan ida hodi hare bibi sira. Bibi sira ne’ebé la’o sala dalan, ha’u sei ba hatudu dalan hodi la’o ba dalan los”, Padre Élio hateten iha omilia.
Nia hatutan, profeta Ezequel fó nafatin esperansa ba povu atu moris nafatin iha esperansa no la’ós moris iha dezesperadu.

Tanba ne’e, pároku ne’e apela mós ba sarani sira atu muda moris ne’e husi moris tuan nian, ne’ebé hamout-aan iha nakukun sala nian, hakaas aan atu sai husi situasaun ne’e liu husi konversaun katak, labele mete ba buat ne’ebé ladiak, moris aat nian, bosok, foti-an, no seluk tan.

Entretantu, konselebrante iha misa ne’e maka, vigáriu Parokiál Padre Eugénio Redentór Marques Caunan Lafo, partisipa husi premiadu Nobel da Pás José Manuel Ramos Horta, autoridade husi postu administrativu

Letefoho, autoridade lokál sira husi suku ualu no sarani husi Estasaun misionáriu Lauana, Goulolo no Lakau kuaze rihun tolu ho aldeia nennolu resin hitu. (*)

Related posts