Tempotimor (Ermera)-Relasiona ho inundasaun ne’ebè iha semana hira liuba fo ameasa ba komunidade iha suku Atara no estraga ba estrada diresaun Ermera no Bobonaro, maibé laiha orientasaun husi nasionál ba membru sira iha munisípiu hodi hola dadus ba situasaun, mak administradór postu Atsabe Manuel Soares Araujo konsidera governu sentrál sei dukur.
Nia afirma, governu sentrál falla, tanba menus kontrola nia membru ne’ebé iha munisípiu oinsa haree ba asuntu infrastrutura, bainhira komunidade no hamutuk ho autoriedade lokál sira hato’o pedidu no husu apoiu emerjénsia, maibè laiha responde.
“Tanba, la orienta nia membru sira iha munisípiu bainhira komunidade sira infrenta problema iha baze hodi tun direta atu fo apoiu, nune’e ami husu apoiu emerjénsia atu faselita ekipamentus hodi normaliza estrada ne’ebé aat mós parte relevante laiha responde, tamba ne’e ha’u hamutuk ho komunidade sira esforsu no organiza malu hodi hadi’a, maibé laiha apoiu husi Ministériu Obras Públika (MOP) munisípiu Ermera nian,” dehan Administradór Manuel liuhusi via telefone ba www.tempotimor.com, Kinta (22/4).
Autoriedade postu Atsabe ne’e mós husu ba govenu liu-liu MOP iha nasional tenki orienta didi’ak membru aira iha munisìpiu hodi tun ba baze nune’e identifika estrada públiku sira no bainhira komunidade presiza apoiu tenki apoiu ho emerjensia.
Liga ba situasaun kalamidade atuál, autoriedade postuAtsabe hamutuk ho saúde kontinua sensibiliza informasaun prevensaun Covid-19 nian ba komunidade sira oinsa atu halo prevensaun no labele hatutan virus ba malu.
Postu Atsabe kompostu husi suku 12 no Aldeia 59 ne’ebé ho totál populasaun hamutuk rihun 26.167. (*)
