Tempu Ukun Aan, Kuda Kontinua Sai Transporte Komunidade nian

Komunidade uza kuda hodi tula produtu lokal ba merkadu Ai-meta, Kuarta (21/07). Foto Tempo Timor

Tempotimor (Ermera)-Maske Timor-Leste hamriik ona durante tinan 19 nu’udar nasaun soberanu ida, maibé infraestrutura baziku iha área rural kontinua hakdasak.

Ba situasaun ne’e, komunidade munisípiu Ermera kontinua uza kuda hodi lori sasan husi aldeia ba merkadu, tanba kondisaun estrada aat.

Read More

Tuir komunidade Saturnino Soares katak, iha Ermera komunidade maioria mak konsidera kuda hanesan transporte, tanba estrada aat dezde ukun aan to’o, agora entaaun kareta labele movimentu.

“Ami iha ne’e, barak mak lakoñese kareta no motor, tanba estrada aat. Nune’e transporte la movimentu mezmu ami iha produtu lokál hanesan fehuk-ropa, koto, ervila inklui produtu seluk tan, maibé kareta ka morot laiha, entaun ami tenki tula iha kuda mak hodi ba fan. Maibé witoan de’it, nune’e difikulta tebes ba ekonomia uma laran,” katak komunidade Saturnino ba www.tempotimor.com Kuarta (21/07).

Nia mós husu ba ba oitavu governu konstituisionál atu tau atensaun mós ba estrada sira ne’ebé liga ba komunidade sira iha área rurál.

Iha fatin hanesan xefi suku Katrai-kraik, Carlos da Conçencão Soares rekoñese katak, durante ne’e komunidade sira lori produtu ba fan iha merkadu maioria uza kuda, tanba estrada aat.

“Komunidade iha ne’e, bainhira hodi produtu ba fan iha merkadu Letefoho mós tenki uza kuda, tanba problema estrada. Entaun produtu ne’ebé lori ba fan ne’e naton de’it. Entaun ida ne’e mós sai hanesan preokupasaun boot ida ba ami hanesan autoriedade lokál,” nia dehan.

Xefe suku ne’e mós husu ba governu liu-liu Ministériu Obras Públika (MOP) atu halo realibatasaun estrada rural iha sira, nune’e komunidade bele asesu ba merkadu.

Alende preokupasaun estrada, komunidade sira mós difikulta ba pesoál saúde ne’ebé atu atende komunidade sira bainhira moras.

“Husu mós ba Ministériu Saúde tenki kompleta parteira mai iha ne’e, tanba iha ne’e mesak médiku no emfermeiru, entaun inan-isin-rua bainhira partus susar tebes no tenki hodi ba Letefoho, maske ho distánsia dook. Tanba ne’e saúde munisípal presiza tetu asuntu ne’e,” nia katak.

Entertantu suku Katrai-kraik kompostu husi aldeia sia mak hanesan aldeia Manturai, Koilesoria, Mankoliria, Hatulete, Mosarmata, Kolkoli, Hatugeo, Hatudumei no Librema ho totál populasaun rihun 2.605 no xefi familia 608.(*)

Related posts