Tempotimor (Ermera)-Tuir Xefe Teknikál Advizór Programa Dezenvolvimentu Nasoens Unidas (UNDP), Davindranauth Bissoon katak, enkontru ho administradór husi munisípiu Likisa, Aileu no Ermera kona-ba oinsa implementa projetu UNDP nian.
“Projetu ne’e planu ba tinan neen, maibé iha tinan ne’e ita sei implementa planu infrestrutura bázika hanesan estrada rurál, irigasaun no bee-moos. Maibé ami mós sei aprezenta ba partisipante sira kona-ba oinsa ita bele uza drong nune’e bele identifika área ne’ebé atu implementa dezenvolvimentu rurál nian,” dehan nia iha Gleno, Ohin (29/07).
Fontes ne’e subliña, programa ne’e sei implementa iha munisípiu Aileu, Likisa, Baukau, Vikeke, Lautem no Ermera, tanba ne’e sei implementa de’it projeitu sanulu hodi kobre munisípiu neen.
Iha fatin hanesan administradór Letefoho, Julião Marito de Deus apresia ba parseiru sira ne’ebé servisu hamutuk ho governu Timor-Leste hodi realiza semináriu no fahe informasaun kona-ba planu UNDP nian.
“Ha’u senti kontenti ba programa ne’ebé UNDP fasilita, tamba hanesan pasu di’ak ida nune’e bele hatutan programa hotu ne’ebé la’o hela iha ita-nia nasaun liu-liu Ermera. Tamba ne’e ami sei koopera di’ak ho sira bainhira programa ne’e implrmenta iha suku no aldeia,” nia administradór ne’e.(*)
