Tempotimor (Ermera)-Relasiona ho polítika governu ne’ebé atu harii uma ba komunidade vulnerável sira iha teritóriu nasionál liuhusi programa Uma ba Kbiit Laek (UKL), maka komuniadde uma-ka’in tolu iha Lasaun sai vensedór ba programa UKL ne’e.
Xefi suku Lasau, Fernando Nunes hatete, uma ne’ebé governu harii liuhusi programa UKL, maka iha suku Lasau identifika aldeia Aiabe nia komunidade uma-ka’in tolu mak governu sei hari’i, tanba vulnerável duni.
“Ha’u nia suku iha aldeia Aiabe nia xefi familia uma-ka’in tolu mak hetan direitu ba uma ne’ebé tuir planu governu sei harii, maibé aldeia sira seluk hein faze tuir mai, tamba tuir dezisaun governu nian, maske suku iha aldeia barak maibé programa harii uma kada suku aldeia ida mak hetan direitu,” dehan xefe suku ne’e ba www.tempotimor.com iha Gleno, Kuarta (30/06).
Autoriedade lokál ne’e afrma, uma-ka’in tolu ne’e hetan selesionadu tanba liuhusi enkontru nível suku no komunidade sira ne’e menus rendimentu duni.
Xefe suku ne’e mós subliña, komunidade iha suku Lasaun hamutuk uma-ka’in 24 mak to’o agora seidauk asesu ba liña eletrisidade.
“Ha’u-nia komunidade iha xefi familia 24 mak sedauk asesu ba eletrisidade dezde ukun-aan to’o agora, maibé ha’u hato’o bei-beik ona ba governu, mais laiha resposta,” katak Nia.
Entretantu suku Lasau iha fatin potensiál ba turizmu komunitária ne’ebé hanaran fatuk leten, maibé governu seidauk fó atensaun mezmu proposta hato’o ona ba munisipál no nasionál iha tinan 2018 ne’ebé to’o agora laiha rezultadu.
Enkuantu suku Lasau kompostu husi aldeia Aiabe, Kaiubu, Ataubu no Nunumea ho totál populasaun rihun 3.474 no xefi familia hamutuk 654.(*)
