Tempotimor (Ermera)-Bazeia ba rekomendasaun Organizasaun Mundiál ba Saúde (OMS) ne’ebé atu proteze ema hotu husi infesaun Covid-19, mak governu Timor-Leste mós kontinua esforsu hodi sidadaun hotu simu vasina.
Ba situasaun ne’e, governu liuhusi komisaun interministeriál kontinua halo kampaña iha teritóriu nasionál, nune’e komunidade metade mak vasina ona vasina AstraZeneca no Cinovax.
Xefi suku Hatolia Vila, Manuel Soares hatete, komunidade iha Hatolia Vila hamutuk 400 mak simu ona vasina, nune’e husi tinan 18-59 no tinan 60 ba leten inklui liña frenti sira.
“Sira husi 18-59 hamutuk 315 no tinan 60 ba leten hamtuk 85 mak simu ona vasina nune’e bele proteje aan husi Covid-19, tamba laiha meius ruma atu satan netik ita husi Covid-19 maibé liuhusi vasina bele proteje ita-nia-aan no kombate husi moras ne’e, tamba ne’e ha’u husu ba komunidade hothotu tenki vasina, lalika rona rumoris ne’ebé laiha benefísiu,” dehan xefe suku Manuel ba www.tempotimor.com Segunda (28/06).
Iha fatin hanesan komunidade Inocencio Martins apresia ba governu tamba esforsu liuhusi vasina bele proteje povu husi moras refere.
“Ha’u apresia tebes ba esforsu governu nian tamba ami bele simu ona vasina, tamba ne’e husu ba governu tenki esforsu nafatin nune’e ami bele kompleta simu vasina ba darauk nian, nune’e ami bele movimentu livre hodi kontinua estudu bainhira kompleta ona vasina tamba vasina importante tebes hodi halakon Covid-19,” nia dehan.
Entretantu tuir dadus ne’ebé iha katak, ema iha Timor-Leste hamutuk 194.546 (25,8%) simu ona vasina COVID-19 doze dahuluk iha Timor Laran tomak durante kampanha vasinasaun no ema hamutuk 25.421 (3,37%) liu mak simu ona vasina doze daruak.(*)
