Tempotimor (Ermera)-Tuir komandante rejiaun IV atuál deputadu Parlamentu Nasionál (PN) José Agostinho Siqueira (Somotxo) hatete, saudozu Francisco Babo “Santa Cruz” nu’udar ema arkitetu no rezisténsia tebes hahú militar iha 1974 hanesan mós komandante Frenti Armada iha fronteira norte.
“Ita hotu hatene katak iha 1979-1980 rezisténsia iha seitór fronteira norte laiha ona, maibé to’o ikus mai iha 1986 to 1993-1994 saudozu nu’udar komandante ida ne’ebé ho arkitetu ne’e deside harii fali fronteira norte mak komandante saudozu “Santa Cruz” hamutuk ho Amu Mario no komandante Ernestu Dudu no Jorge hodi komanda forsa nune’e hala’o gerilia. Tamba sira mak hahú rezisténsia iha ne’e no loke dalan ba komandu da luta hodi hasoru inimigu no bele mai iha fronteira norte,” dehan nia ba jornalista sira iha Ersoi bainhira halot Saudozu “Santa Cruz”, Sábadu (03/07).
Deputadu ne’e mós konta istória katak, tinan barak nialaran, forsa husi parte leste labele tama iha fronteira norte nian, tanba inimugu domina.
“Dezde 1981-1982 ami tenta atu tama iha fronteira defisil, tamba inimigu domina liu, tanba ne’e saudozu nu’udar ema ne’ebé matenek hamutuk Amu Mario inklui ho nia membru sira hodi harii rezisténsia frenti klandestina iha 1986, nune’e frenti klandestina kontinua eziste iha munisípiu hothotu, tanba ne’e ikus mai ami konsege mai fronteira ho komandu da luta no maun boot Xanana mai duni iha fatin Ersoi saudozu nia uma rasik,” konta Somotxo.
Entretantu, nia mós lori governu no estadu nia naran fó omenajen no onra boot ba saudozu no familia hotu, tanba husi saudozu nia matenek arkitetu mak harii abrigu nune’e bele subar komandu da luta sira no grilleiru tomak inklui kuadrus polítika militar frenti Armada nian.
Entretantu saudozu Santa Cruz moris iha Ersoi, suku Poetete, postu administrativu Ermera iha loron 5 maiu 1952, oan husi José Bernadino Soares aifunan domin no Madalena Soares aifunan domin. Saudozu iha maun-alin na’in hitu no saudozu Santa Cruz remata nia peregrinasaun iha loron 1 jullu 2021 ho tinan 69 ne’ebé husik hela fen kaben Celeste de Jesus Babo ho oan na’in lima ne’ebé kompostu husi mane na’in tolu n feto na’in rua.(*)
