Tempotimor (Ermera)-Tuir sekretáriu ezekutivu Konsellu Kombatentes Libertasaun Nasionál iha Munisípiu Ermera (KKLNME), Armindo das Neves katak, veteranu munisípiu Ermera sai ona vítima ba mafiozu sira iha Banku Nasionál Komérsiu Timor-Leste (BNCTL).
Ba kestaun ne’e KKLNME sei organiza veteranu hotu iha munisípiu Ermera hodi halo pers konferénsia hasoru BNCTL munisípiu Ermera, tanba halo biokota ba orsamentu ne’ebé veteranu sira halo kréditu.
“Ami sei organiza veteranu sira halo konferénsia imprensa, tanba osan ne’ebé veteranu sira halo kréditu iha proposta hamutuk $65 mill, maibé sira fó de’it $62 mill no sira buka maius oioin hodi hatete katak veteranu nia osan $13 mill, iha ida-idak nia konta bankária hanesan kast, maibé realidade osan nia paradeiru laiha, tanba ne’e veteranu labele sai vítima ba mafiozu sira,” dehan Armindo ba iha suku Poetete, ohin (22/07).
Nia mós dehan, veteranu munisípiu Ermera mós sai vítima ba ATM ne’ebé BNCTL Ermera fasilita.
“Bainhira veteranu sira foti osan uza ATM, sistema la print surat tahan sai, entaun husi ne’e sira labele hatene osan restu iha konta bankária, ezemplu; sira ne’ebé kada fulan foti $276 dollar, sira tenke foti de’it $270 entaun osan hela $6 dollar, mais surat tahan la print sai oinsa mak sira hatene osan iha?,” katak nia.
Preokupasaun ne’e, Konsellu Kombatentes Libertasaun Nasionál Munisípiu Ermera iha tempu badak hamutuk ho veteranu sira sei alerta ba públika liga ba mafia sira ne’ebé mosu iha BNCTL Ermera liuhusi konferénsia imprensa, tanba deskonfia politiza osan veteranu sira nian.(*)
