Tempotimor (Ermera)-Prezidente Autoriedade Munisípiu Ermera (PAME) sesante, José Martinho dos Santos husu ba Prezidente Autoriedade Munisípiu Ermera foun atu kontinua programa anterior ne’ebe la realiza liu-liu fó prioridade ba dezenvolvimentu rurál.
“Husu ba PAME foun presiza kontinua programa ne’ebé iha hodi desenvolve Ermera ba oin, liliu esforsu atu hari edífisiu autoridade ne’ebé di’ak hanesan iha munisípiu Baucau no Bobonaro,” dehan PA Ermera sesante, José ba www.tempotimor.com hafoin partisipa iha serimónia tomada de pose PA munisípiu Ermera foun iha Gleno, Kinta (01/07).
Eis prezidente ne’e mós dehan, durante mandatu tinan lima iha dezafiu boot teb-tebes, maibé konsege hakat liu dezafiu sira ne’e, maske programa hotu la konsege realiza hotu.
“Ha’u-nia mandatu konsege konklui liliu iha seitór edukasaun no saúde hanesan konstrusaun postu saúde iha suku hotu no eskola tékniku vokasionál iha Gleno no Railaku inklui projeitu bee-mos iha suku no aldeia liliu ba desenvolvimentu rurál inklui kapela,” katak nia.
Nia akresenta, durante iha mandatu servisu balun lakonsege realiza, tamba ho impase polítika nune’e impede programa sira.
“Ha’u-nia mandatu simu knaar iha 2016 nu’udar PAME, maibé ho situasaun impase polítika ne’ebé naruk, nune’e munisípiu durante tinan tolu ho de’it Dotasaun Orsamentu Temporáriu (DOT) nune’e sai dezafiu mai ha’u-nia mandatu hodi asume knaar ne’ebé iha, tamba ne’e programa barak mak la realiza,” nia dehan.
PA sesante ne’e sublina, kestaun ne’ebé kontinua sai prekupasaun ba komunidade Ermera mak hanesan estrada, eletrisidade, bee-mos maibé seitór edukasaun no saúde kontinua fó atensaun.
Entretantu durante tinan lima, prezidenti autoriedade munisípiu Ermera sesante konsege harii ona sentru saúde no postu saúde iha suku 52, eskola tékniku vokasionál rua iha Gleno no infraestrutura baze iha postu administrativu Railaku.(*)
