Tempotimor (Ermera)-Tuir diretór saùde Munisípiu Ermera, António de Deus Fatima, komunidade iha munisípiu Ermera laiha vontade hodi partisipa iha vasina faze daruak.
Diretór ne’e afirma, tarjetu husi Ministériu Saùde (MS) ba ema ne’ebé atu simu vasina faze daruak iha Ermera ho totál alvu hamutuk 8.233, maibé realidade komunidade sira laiha vontade atu partisipa ba vasina tanba informasaun husi média sosiál ne’ebé halo pániku komunidade.
“Informasaun ne’ebé fó sai iha média sosiál husi ema ne’ebé iresponsabilidade nune’e halo komunidade tauk atu partisipa vasina, tamba ne’e, Ami iha alvu ba ema ne’ebé atu simu vasina faze daruak hamutuk 8.233 maibé sira ne’ebé simu ona vasina hamutuk 3.644, entaun signifika ita tenki vasina tan ema 4.589, nune’e bele kompleta tarjetu ne’ebé iha,” dehan Diretór António ba www.tempotimor.com iha nia knaar fatin Gleno, Kuarta (07/07).
Ba kestaun ne’e, ekipa saúde kontinua esforsu oinsa konvese komunidade sira atu kontina vasna, tanba vasina de’it mak bele aumenta ema-nia imunidade.
“Ami nafatin esforsu hodi hala’o koordenasaun ho autoridade lokál no parte igreja inklui entidade hotu, nune’e bele tulun ami hodi sensibiliza informsaun ba komunidade sira bele partisipa másimu ba vasina,” katak Nia.
Enkuantu programa vasinasaun iha munisípiu Ermera husi faze dahuluk no faze daruak atinje ona pursentu 60%.(*)
