Idozu Na’in 25 iha Saré Seidauk Simu Subsídiu

Tempotimor (Ermera)-Xefe suku Saré, Celestino de Araújo senti triste ho servisu Ministériu Solidariedade Sosiál no Inkluzaun (MSSI) no Banku Nasionál Komérsiu Timor-Leste (BNCTL) Ermera tanba komunidade na’in 25 tama ona tinan 60 komesa 2017, maibé to’o agora la hetan direitu ba subsísdiu.

Xefe suku ne’e dehan, kada tinan dadus sira ne’e haruka ba parte relevante, maibé bainhira hala’o pagamentu idozu sira ne’e naran laiha.

Read More

“Ha’u senti triste tanba kada tinan ami halibur dadus idozus ne’ebé tinan 60 ona atu hetan direitu ba pensaun, maibé naran ne’ebé haruka ba MSSI no BNCTL naran laiha lista, bainhira atu halo pagamentu. tanba ne’e husu ba Primeiru Ministru tenki toma atensaun ba sira ne’ebé servisu iha parte relevante tanba idozu sira ne’e veteranus ne’ebé kontribui ba ita rain,” dehan Nia ba www.tempotimor.com iha Igreja Ermera, Kuarta (14/07).

Nia dehan, husi falla MSSI ho  banku nia, autoridade lokál mak sai vítima no alvu ba komunidade sira-nia krítika.

“Ami vítima ba sira-nia servisu ne’ebé politiza naran idozu nian ne’ebé ami haruka bebeik ba, maibé ikus atu halo pagamentu naran kontinua latama iha lista nune’e idozu sira fó sala mai ami, maibé ne’e husi nivél altu nia kompeténsia,” katak nia.

Entertantu daudaun ne’e suku Saré nia komunidade ne’ebé simu subsídiu idozu nian hamutuk 135 inklui  difisiénte na’in 15.

Alende ne’e, suku Saré husi tempu ukun-aan to’o agora sedauk asesu ba estrada no eletrisidade, fatin refere mós ustinu Timor-Leste nian.

Enkauntu suku refere kompostu husi aldeia neen, mak hanesan Demoslau, Norema, Dirhatilau, Poelete, Raimate no Saré ne’ebé ho totál populasaun rihun 5.900 kompostu husi xefi familia rihun 2.270.(*)

Related posts