Tempotimor (Ermera)-Sentru Juventude Munisípiu Ermera (SJME) fasilita formasaun lian inglés no komputadór ba joventude na’in 60 iha munisípiu Ermera.
Diretór Ezekutivu SJME, Abrão de Deus katak, formasaun refere ba etapa dahuluk nune’e fasilita de’it ba juventude na’in 60, nune’e kontinua mantein distansiamentu sosiál, tamba iha hela pandemia Covid-19.
“Objetivu prinsipal husi formasaun ne’ebé ami fasilita atu hasa’e koñesimentu profesionál, nune’e bele iha abilidade ne’ebé kualidade oinsá ba futuru hodi implementa iha servisu ne’ebé sira iha ba,” dehan Abrão ba www.tempotimor.com iha Gleno, Segunda (07/06).
Juventude sira ne’ebé partisipa iha formasaun ne’e na’in 30 tuir formasaun lian inglés, na’in 30 tuir formasaun komputadór. Nune’e partisipante no formadór sira tenki partisipa ativu nune’e bele alkansa objetivu ne’ebé iha ho kualidade.
Iha fatin hanesan juventude Maria dos Santos senti kontente, tamba mezmu iha hela Pandemia Covid-19, maibé nafatin partisipa iha formasaun.
“Ha’u senti kontente tebes ho formasaun ne’ebé agora ami partisipa ba, tamba hanesan parte pozitivu ida mai ami oinsá prepara-aan no bele hasa’e ami-nia matenek, nune’e bele aplika iha sosiedade no servisu ne’ebé bainhira ami hetan,” dehan Maria.
Entretantu, formasaun lian inglés no komputadór ne’e durasaun ba fulan tolu, depois hetan sertifikadu, bainhira hetan avaliasaun di’ak husi formadór sira.(*)
