Tempotimor (Ermera)-Motorista no Polísia Nasionál Timor-Leste (PNTL) Munisípiu Ermera halo reabilitasaun manuál ba ponte vilamaria iha postu administrativu Hatoli, tanba ameasa kotu no difikulta ba movimentu transporte públiku no privadu sira.
Tuir motorista Lucas Martins katak, ponte ne’ebé aat iha vilamaria difikulta motorista sira husi diresaun postu Hatolia labele kontinua movimentu. Nune’e motorista no pasajeiru inklui PNTL apoiu servisu voluntáriu hodi hadi’a ponte refere ho ekipamentu manuál.
“Ita hotu ne’ebé hanesan motorisata liuhusi diresaun ne’e, hakarak ka lakohi tenki hadi’a ponte ne’e, nune’e labele fó ameasa mai ita no pasajeiru sira ne’ebé movimentu hamutuk ho ita. Tamba ita mós presiza kontribui hotu la’ós buat ne’ebé ita bele apoiu mós sei husu ba estadu, bainhira ita mak husu de’it ita laiha nasionalizmu ba ita-nia rain rasik,” dehan Lucas ba www.tempotimor.com iha Vilamaria, Segunda (07/06).
Iha fatin hanesan pasajeiru Sonia Menezes hatete, nu’udar Ermeraoan tenki kontribui ba desenvolvimentu, tamba lakohi kontribui, entaun labele movimentu.
“Ita tenki servisu duni, nune’e labele fó ameasa mai ita, karik ita ho kareta liu ba mai, bele livre husi asidente, tamba se ita lakohi hadi’a hein de’it estadu bainhira loos no agora estadu tenki haree liubá Covid-19, la’ós haree ba desenvolvimentu ida la vale mós presiza husu ba estadu,” katak Nia.
Pasajeiru ne’e mós husu ba emprezáriu (patraun) Ermeraoan sira, ne’ebé liu ba mai iha estrada ne’e, atu kontribui no hatudu ezemplu di’ak ba munisípiu seluk.
Enkuantu insiativa ba hadi’a ponte ne’e la’ós orientasaun husi autoriedade lokál sira, maibé inisiativa husi motorista no pasajeiru inklui PNTL.(*)
