Finalista UNTL 372 Hala’o Estájiu Pedagójiku iha Ermera

Estudante Finalista na'in 372iha hela salaun Igreja Gleno molok lokaliza ba fatin estajiu nian. Sesta (23/07). Foto Tempo Timor

Tempotimor (Ermera)-Atu termina estudu iha universidade ida estudante sira tenke aplika teória sira ne’ebé aprende ona iha baze bainhira tama ona ba finalista.

Ba kestaun ne’e, sekretáriu Autoridade Munisípiu Ermera, José da Costa Domingos apresia ba finalista husi Universidade Nasionál Timor Lorosa’e (UNTL) hamutuk 372 ne’ebé sei hala’o estájiu pedagójiku iha ensinu báziku.

Read More

“Ami husu ita-boot sira tenki hatudu sentidu profesionalizmu no responsabilidade iha atividade ne’ebé iha, katak presiza hakruk, sériu no esforsu estuda, nune’e bainhira iha aula estudante bele kompriende,” dehan nia ba estajiáriu sira iha salaun Igreja Gleno, Sesta (23/07).

Iha momentu hanesan, Diretór Edukasaun Munisípiu Ermera, Marcos Soares Martins hatete, finalista sira hetan opurtunidade ba hala’o estájiu refere, tamba sira hala’o ona estudu durante tinan tolu iha ensinu superiór.

“Tamba sira hala’o estudu tinan tolu ona iha UNTL, ne’ebé sira sei halo estájiu iha ita-nia munisípiu hamutuk 372, ne’ebé sei kobre ba postu lima iha Ermera no fahe ba fatin estájiu hamutuk 31 durante fulan tolu,” katak Nia.

Alende ne’e, eis dekanu Fakuldade Edukasaun Arte Umanidade (FEAU) UNTL, Pedro Soares dehan, estájiu pedagójiku ne’e hanesan disiplina ida ba estudante ne’ebé iha área edukasaun.

“Ita-nia pratika ba sira durante fulan tolu, tanba sira baserelatu no nu’udar manorin ne’ebé iha ona esperiénsia hanorin ona entaun estájiu ne’e bele aumenta liután sira-nia koñesimentu teória no prátika, nune’e bele uza maneira oioin, inovativu iha mudansa foun para bele hanorin ita-nia oan sira,” nia tenik.

Entertantu estajiáriu Ecariano Manuel Soares senti kontenti, tanba bele to’o ona faze estájiu pedagójiku nian.

“Ami sei hatudu rezultadu pozitivu, tamba sei halo planu de aula ne’ebé orientador fó, nune’e bele aplika ba estudante EBC sira iha baze, tanba atu hatutan métudu foun ne’ebé durante ne’e dosente sira fó,” nia dehan.(*)

Related posts