Tempotimor (Ermera)-Relasiona ho esforsu governu nian ne’ebé atu salva povu Timor-Leste husi virus corona, mak Sekretariadu Autoridade Munisípiu Ermera (SAME), José da Costa Domingos husu komunidade sira atu simu vasina AstraZeneca.
“Husu ema hotu-hotu ne’ebé iha liña frente hahú husi prezidente autoridade to’o xefi aldeia no instituisaun relevante, ita tenki kolabora di’ak ho Organizasaun Mundiál ba Saúde (OMS) liliu ekipa saúde, tamba laiha meiu seluk bainhira ema ruma iha saúde di’ak se laiha intervensaun husi saúde,” dehan nia ba www.tempotimor.com iha sentru saúde Gleno, Segunda (14/06).
Nia mós dehan, vasina ba doze daruak, nu’udar libertasaun ida ba ita hotu hodi livre husi Covid-19.
“Tamba vasina daruka hanesan faze ida ba libertasaun mai ita no povu sai husi inimigu invizivél Covid-19, tamba ita iha liña frente hakarak ka lakohi ita tenki sai ezemplu,” katak Nia.
Iha fatin seluk, Diretór Servisu Saúde Munisípiu Ermera (SSME), António de Deus Fátima katak governu sentrál oferese tan ona vasina AstraZeneca hamutuk doze 872 ba munisípiu Ermera hodi kompleta ekipa line oin ne’ebé molok ne’e simu ona doze dahuluk.
“Ita simu tan doze daruak hamutuk 872, ne’e sifnifika ita sei vasina ema ho totál rihun 8.072, maibé sira ne’ebé frontline obrigatóriu tenki vasina, tamba atu kompleta vasina ne’ebé simu ona iha faze dahuluk. Tamba ne’e vasina ne’e rasik sei prioridade liu ba sira ne’ebé idade 18-59 ne’ebé iha moras no inan-aman ne’ebé idade 60 ba leten maibé la obrigatóriu,” dehan Diretór ne’e.
Diretór ne’e mós hein katak, komunidade Ermera barak mak sei partisipa maibé laiha obrigatóriu.
“Ita espera ho sosializasaun no advokásia iha postu no aldeia sira ne’ebé hetan apoiu husi parte igreja, maka ita-nia komunidade sira sei oferese aan ba vasina, tanba ne’e importante tebes atu salva ita hotu husi Covid-19 no bele aumenta imunidade hodi luta kontra inimigu ne’ebé afeta ba ita-nia saúde,”.(*)
