Tempotimor (Gleno)- Prezidente Repúblika (PR) Francisco Guterres Lú Olo hahú halo diálogu ho povu munisípiu Ermera kona-ba papél estadu nian, no deklara katak, hanesan xefe estadu la’ós mai atu halo kontaktu eleitorál.
Prezidente Repúblika esplika katak, kontestu diálogu ne’ebé halo iha Ermera, ne’e halo iha kontestu Prezidente Repúblika ho modelu diálogu aberta.
“Diálogu ne’e diferensa husi kontextu ida kontaktu eleitorál ka mai halo fiskalizasaun ka halo médida sansiona kona-ba saida mak autoriedade lokál sira halo iha ne’e. Diálogu ida ne’e PR hakarak rona diretamente husi ita-boot sira, saida mak ita-boot sira sente no hakarak,” PR Lú Olo hateten liuhusi nia diskursu perante diálogu ho povu Ermera iha salaun parokial Gleno, Kinta (19/11).
Xefe estadu ne’e mós subliña, membru governu sira ne’ebé akompaña nia iha vizita ne’e la’ós PR mak komanda, maibé tamba membru governu koopera ho prezidente hodi rona diretamente saida mak povu sente, atu serví povu no nasaun Timor-Leste.
“Diálogu ida ne’e ita hahú, entaun ha’u hakarak loke diálogu ida ne’e ho aspeitu tolu ne’ebé ha’u hakarak agradese ba autoriedade munisípiu Ermera ne’ebé organiza atividade ne’e no aspeitu seluk mak ha’u (PR Lú Olo) hakarak hateten kona-ba difikuldade estadu ne’ebé sai difikuldade ba ita hotu atu reafirma fila fali ita-nia estadu nia autoriedade. Ikus liu mak situasaun sósiu ekonómiku ita-nia populasaun,” Lú Olo dehan.
Molok tama ba diálogu entre PR Lú Olo no povu Ermera, Prezidente Autoriedade Munisípiu Ermera José Martinho dos Santos mós aprezenta ba PR Lú Olo kona-ba situasaun jerál nivel munisípiu Ermera nian liuliu kona-ba totál populasaun.
“Munisípiu Ermera populasaun númeru daruak iha Timor-Leste. Ne’ebé Ermera tebe sai tiha ona munisípiu Baukau iha segundu lugar kona-ba totál populasaun ne’ebé boot daruak iha TL, maibé ohin populasaun Ermera liu Baukau,” PA Ermera hateten.
Entretantu, munisípiu Ermera daudaun ne’e iha postu administrativu lima, suku 52 no aldeia 276 ho nia totál populasaun rihun 140 ne’ebé iha labarik tinan 16 ba kraik hamutuk rihun 54.
Munisípiu ne’e nia iha médida largura kilometru 120 kuadradu ne’ebé fronteira ho Aileu, Maliana no Likisá. (*)
