Tempotimor (Ermera)-Governu liuhusi Ministériu Saúde (MS) harii ona sala izolamentu ba pasiénte Covid-19 iha Gleno, kapitál munisípiu Ermara.
Diretór saúde Munisípiu Ermera António de Deus Fatima katak, terderizasaun ba projeitu ne’e fasilita husi Ministériu Saúde (MS), nune’e kompañia Sali-Magu Unip, Lda mak sai manan na’in ba projeitu refere.
“Tamba ne’e, kompañia ne’ebé responsavel ba obra ne’e foin hahú implementa servisu iha fulan maiu nia laran, tamba ita iha hela Serka Sanitária (SS). Nune’e ita espera kompañia sei hala’o servisu tuir tarjetu ne’ebé governu nian,” dehan António ba www.tempotimor.com iha nia knaar fatin Gleno, Tersa (08/06).
Diretór ne’e subliña, konstrusaun ba edifísiu izolamentu ne’e durante fulan tolu nia laran.
“Durasaun projeitu ne’e fulan tolu de’it tuir tarjetu MS nian, nune’e husu ba kompañia tenki iha responsabilidade ho sériu no bele finaliza tuir tarjetu governu no ita hein iha fulan tolu ne’e remata ona, atu nune’e bele muda fali pasiénte iha estadium Kafé mai iha ne’e,” dehan nia.
Enkuantu konstrusaun refere harii iha sentru saúde Gleno nia kotuk ne’ebé sei finaliza iha fulan jullu ne’ebé ho totál orsamentu hamutum rihun $165.(*)
