Pasiénte covid-19 la koopera ho saúde, APL husu blokeia totál dalan ba Letefoho

  • Whatsapp
Administrador Postu Letefoho, Julião Marito de Deus.

Tempotimor (Ermera)-Relasiona ho pasiénte positivu Covid-19 na’in 16 ne’ebé lakohi koopera ho parte saúde no seguransa sira nune’e kontinua livre iha postu administrativu Letefoho, maka Administradór Postu Letefoho Julião Marito de Deus husu atu blokeia totál estrada diresaun ba Letefoho.

Tuir administradór postu Letefoho Julião Marito de Deus katak, bainhira pasiénte positivu sira kontinua la kolabora ho saúde no autoriddade hodi evakua ba sala isolamentu mak, postu Letefoho sei blokeia total, nune’e husu  bà autoridade munisìpal no governu sentrál atu aplika serka sanitária no konfinamentu obrigatóriu.

“Ha’u rasik ho autoridade sira ba direita ko’alia ho pasiénte positivu nia familia husu atu kolabora nune’e evita transmisaun, maibé pasiénte sira  nafatin la kolabora, tanba ne’e ami sei haruka pedidu ida ba ekipa Covid-19 inklui autoridade munisipál no seguransa husu atu blokeia no aplika SS  ami nia postu. Bainhira pasiénte refere entrega aan hodi kumpri ba izolamentu mak foin normaliza fali,” dehan nia ba www.tempotimor.com liuhusi viatelefone, segunda (26/04).

Nia reforsa, tanba de’it isu sosiál ne’ebé iha, katak Covid-19 ne’e laloos no polítika mak halo komunidade sira la koopera ho saúde no parte seguransa, tanba ne’e husu ba saúde no governu tenki haruka ekipa sira tun mai baze rurál nune’e sensibiliza imformasaun loloos ba komunidade kona-ba Covid-19 nian.

Entertantu, pasiénte sira ne’ebé to’o agora lakohi koopera ho saúde no seguransa sira iha postu Letefoho hamutuk na’in 16, ne’ebé sei fó risku ba komunidade suku 8 no aldeia 67 ho total populasaun 28.252 iha postu Letefoho.(*)

Related posts