Tempotimor (Ermera)-Hafoin mosu udan boot halo Timor-Leste tomak hasoru dezafiu maka, Administradór Postu Letefoho, Julião Marito de Deus hamutuk ho komunidade enkamiña ona proposta ba Institutu Jestaun ba Ekipamentu (IJE-IP), maibé to’o agora laiha resposta.
Nu’une’e administradór postu Letefoho, Julião Marito deskonfia IJE-IP TL, la konsidera proposta ne’ebé komunidade Letefoho hato’o husu apoiu emerjénsia.
Nia dehan, estrada públiku ne’ebé liga diresaun Letefoho ba postu Atsabe inklui mai Gleno aat no ameasa ba komunidade iha tempu udan, maibé IJE-TL la preokupa ba nesesidade komunidade nian, liu-liu transporte públiku no privadu sira.
“Proposta ne’ebé hato’o ba IJE atu husu apoiu emerjénsia oinsa bele hadi’a estrada públiku ne’ebe aat iha ami nia postu. Tanba ne’e iha loron (8/1/21) hato’o proposta ba IJE nasionál atu husu apoiu emerjènsia atu hadi’a estrada ne’ebè aat, maibè iha (12/1/21), ekipa husi IJE nasionál mai halo verifika no observasaun hodi foti dadus no iha (19/1) mòs kontinua verifika,” dehan Administradór Postu Letefoho Julião ba www.tempotimor.com, Kinta (29/4).
Nia firma, proposta husi suku seluk iha, maibé postu Letefoho nian de’it mak seidauk sai.
“Maibé realidade ami akompaña husi website IJE nian, bainhira prezidente IJE halo intervervensaun ami nia proposta ne’e la temi no fó sai, maibe proposta sira husi postu seluk fó sai, tanba ne’e ami senti prekupa tebes, nune’e ami konsulta ho ekipa IJE ni’an maibe la’iha solusaun,” dehan nia.
Nia reforsa, IJE tenke iha responsabilidade ba asuntu ne’e, tanba ekipa sira mai verifika dadus dala 2 ikus mai prezidenti IJE nia intervensaun la fo sai.
Bainhira IJE-TL kontinua ignora no la konsidera nafatin proposta ne’ebé komunidade Letefoho hato’o mak, sei konvida komunidade no autoridade lokál sira inklui média atu halo konferénsia imprensa.
Postu Letefoho kompostu suku 8 no aldeia 67 ho tòtal populasaun 28.252. (*)
