Tempotimor (Ermera)-Hafoin governu liuhusi Konsellu Ministru (KM) aprova hodi aplika serka sanitária iha munisípiu Ermera, maka halo komunidade agrikultór sira la hetan rendimentu, tanba hola na’in menus.
Liga ba situasaun ne’e, halo agrikultór sira sai vítima no labele fa’an produtu sira, nune’e modo sai dodok iha kantaderu laran.
Tuir inan faluk Sandra Soares (52) nu’udar produtór ba kanko, senti triste, tanba kanko sai dodok no laiha ema atu sosa.
“Ami nu’udar ema agrikultór iha tinan ida ne’e, moris susar tebes, tanba ha’u nia kanko sai dodok no labele hodi ba fa’an iha Dili, tanba dalan taka hotu, maibé iha tinan hira liuba kotuk ami bele ba fa’an iha Dili, nune’e hetan osan ruma hodi sosa hahan uma laran,” dehan produtór kanko ne’e ba www.tempotimor.com iha bairu Atres, Sesta (30/4).
Inan faluk ne’e mós husu ba Primeiru Ministru (PM), Taur Matan Ruak atu haree oinsa governu, no emprezáriu sira bele bele hola produtu ne’ebé komunidade Gleno prodúz.
“Ha’u husu ba avo Taur Matan Ruak, favor tenki ko’alia ho loja sira ne’ebé iha Dili hodi mai sosa ami-nia modo lori ba Dili, nune’e bele tulun netik ami povu sira, tanba ami labele ba Dili. Se karik avo PM haruka emprezáriu mai sosa ami-nia produtu, ami agrikultór aban bainrua kontinua fó votus ba avó, tanba ha’u nia familia hotu uluk vota ba avó Taur nia partidu,” dehan Nia.
Nune’e mos, Alarico de Deus nu’udar produtór ba modo, afirma, moris iha tinan 2021 ne’e susar tebes kompara ho 2020, tanba livre hodi hetan osan.
“Iha 2020 ami bele livre hodi fa’an modo ba Dili no iha Gleno mós ema sosa, maibé agora laiha liu modo sira sai dodok no han inklui fó han animál de’it,” dehan Alarico.
To’os na’in ne’e afirma, iha tinan 2020 kuandu kolleta modo bele hetan to’o dollar $200 to’o $250, maibé agora atu sosa de’it dollar $10 mós susar tebes no modo sira dodok tan iha kantadeiru laran de’it. (*)
