Terus ba SS Negosiante Filomena Husu Deputadu Vota Kontra EE

Negosiante sira ne'ebe fa'an hela modo iha merkadu Ermera. Foto Arkivu

Tempotimor (Ermera)-Hafoin marsu 2020 Covid-19 tama Timor-Leste to’o 30 Abril 2021 horseik afeta ona ema rihun 2.276, nune’e governu liuhusi reuniaun Konsellu Ministru (KM) deside aplika ona serka sanitária ba munisípiu sia iha Timor-Leste, tanba afeta husi Covid-19.

Liga ba serka sanitária ne’e mak, negosiante sira maiória tenke lakon oportunidade hodi hetan dollar ida ba loron ida, nune’e negosiante Filomena de Jesus husu deputadu sira iha Parlamentu Nasionál (PN) atu vota kontra ona Estadu Emerjénsia (EE), tanba povu terus liu ona.

Read More

“Husu ba deputadu sira iha Parlamentu Nasionál tenki hanoin ami povu kbiit laek sira, labele vota nafatin ba SS tenki vota kontra, nune’e bele tulun ami povu hodi bele buka moris atu sustenta oan sira-nia eskola no hahan uma laran,” dehan negosiante Filomena ba www.tempotimor.com iha nia negósiu fatin Gleno, Sesta (30/4).

Nia mós dehan, la’ós negosiante de’it mak terus, maibé motorista sira ne’ebé lori kareta privadu buka osan mós susar loos.

“Durante ne’e ami negosiante mak hala’o movimentu ba mai tanba faan produtu lokál sira, nune’e kondutór sira mós bele hetan osan, maibè SS halo ami-nia produtu mós ema la sosa no sai dodok hodi fó han animal. Tamba ne’e husu ba governu tenki hanoin didi’ak mak bele foti desizaun atu estende tan serka sanitária,” katak Nia.

Iha fatin hanesan, motorista Jaimito da Conçencão sente triste tanba liuhusi serka sanitária labele hetan rendimentu hodi sustenta familia uma laran.

“Bainhira sedauk iha SS loron ida bele hetan rendimentu dollar $25, maibé agora loron ida nunka hetan rendimentu oitoan mós laiha, tamba ne’e, ha’u senti triste ho situasaun agora, oinsa mak bele fó han fen ho oan se governu nafatin estende SS iha ami-nia munisípiu, nune’e difikulta tebes ba ami ne’ebé depende ba pasajeiru,” nia dehan.

Motorista ne’e afirma, husi dader to’o lokraik, kareta para iha merkadu de’it, tanba laiha pasajeiru entaun labele tula no rendimentu laiha.(*)

Related posts