Tempotimor (Ermera)-Liga ba loron Funsaun Públika ne’ebé monu iha 15 jullu, mak funsionáriu públiku iha munisípiu Ermera komemora loron importante ne’e ho misa agradesimentu no marsa saudavel hodi aumenta espiritu serví no fisikamente hodi hala’o atendementu ba públiku.
“Ohin ita hala’o atividade rua ne’ebé refleta ba komemorasaun loron funsaun públiku nian mak misa agradseimentu ho halo jinástiku haleu kapitál Gleno, entaun husi atividade ne’e bele aumenta espíritu funsionáriu públiku nian hodi serví komunidade no administrasaun iha munisípiu Ermera ho di’ak tuir metas ne’ebé trasa ona iha estatutu funsuan públika nian,” dehan Prezidente Autoriedade Munisípiu Ermera, Eujebio Salsinha ba www.tempotimor.com iha Gleno, Ohin (15/07).
Iha fatin hanesan, Julio dos Reis Exposto nu’udar funsionáriu públiku sente kontenti ho atividade ne’ebé realiza hodi komemora ba loron funsaun públiku nian.
“Ha’u senti orgollu tebes tamba eventu ida hanesan ne’e foin ba dahuluk ho komemorasaun loron funsaun públiku nian. Maske tinan-tinan ita realza, maibé ba dahuluk ita realiza eventu ne’e depois husi misa forma tiha ita nia esperitualidade, ita kontinua kedas ba espíritu fízika, hein katak husi atividade ne’e la para de’it iha ne’e maibé sei kontinua,” nia tenik.
Enkuantu atividade refere hetan partisipasaun másimu husi funsionáriu públiku shotu iha munisípiu Ermera nomós tuir planu atividade jinástiku ne’e sei realiza kada fulan.(*)
