Tempotimor (Ermera)-relasiona ho polítika governu nian hodi halo dezenvolvimentu ba estrada rurál sira iha suku no aldeia sira maka, Obras Públika Munisípiu Ermera rekolla ona dadus hamutuk sanulu kona-ba dezenvolvimentu estrada rurál.
Tuir xefi dezenvolvimentu estrada rurál Obras Públika munisípiu Ermera, Danilo Lopes da Pereira katak, dadus sira submete ona ba Ministériu Obras Públika (MOP) iha nasionál hodi hein ba tederizasaun bazeia ba implementasaun estrada rurál kategória tolu.
“Ko’alia kona-ba dezenvolvimentu rurál liliu munisípiu Ermera ita iha parte ba implementasaun estrada rurál fahe ba kategoória tolu, hanesan manutensaun rutina, manutensaun periodika no reabilitasaun. Tanba ne’e, dadus ne’ebé rekolla ba dahuluk hamutuk sanulu iha tinan ida ne’e, sei hahú ho reabilitasaun nune’e faze ba daruak nian sei tama iha manutensaun rutina, maibé bainhira implementa periodika ne’e presiza ho montante orsamentu ne’ebé diferente tanba dalaruma tinan ida no tolu mak foin implementa, nune’e ami identifika fatin ne’ebé atu halo dezenvolvimentu ba reabilitasaun mak hanesan Atsabe, Launa, Katrai-leten, Manusae, Ligimea, Poetete, Ponilala no Koilate, tanba parte sira ne’e mak tama ba iha prosesu tenderizasaun ba iha tinan 2021 nian,” dehan Danilo ba www.tempotimor.com iha knaar fatin Gleno, Segunda (31/05).
Xefe ne’e akresenta, prosesu sira ne’e iha ona faze preparasaun ba tenderizasaun, tanba dadus sira submete ona ba MOP nasionál hodi hein ba prosesu implementasaun.
Enkuantu orsamentu ne’ebé atu aloka ba programa dezenvolvimentu rurál ne’e nia parte labele fó komentáriu, tanba kompeténsia ministru nian.(*)
