Tempotimor (Ermera)-Komunidade suku hatagau ne’ebé lokaliza iha postu administrativu Letefoho, munisípiu Ermera to’o ona tinan 19 Timor-Leste ukunaan, maibé komunidade refere kontinua la asesu ba liña eletrisidade.
Xefi suku Hatugau, Miguel Madeira Sarmento hatete, dezde ukun aan to’o agora suku Hatugau la asesu ba liña eletrisidade, maske hato’o bebeik ba proposta ba Ministériu Obras Públika (MOP) munisípiu no nasionál.
“Ha’u senti triste ho ukun aan ida ne’e, tamba ami to’o agora la asesu ba liña eletrisidade, maske ami-nia prekupasaun hato’o dalabarak ona ba iha MOP nasionál no munisípiu, maibé to’o agora laiha rezultadu,” dehan xefe suku Miguel ba www.tempotimor.com liuhosi via telefone, Ohin (31/5).
Autoriedade lokál ne’e afirma, governu liliu MOP tenki konsidera prekupasaun povu nian, inklui deputadu Ermeraoan ne’ebé iha Parlamentu Nasionál (PN) labele tuur nonok, taka tilun ba prekupasaun povu Ermera nian.
Nia mós husu kompañia Romantis atu responsabliza ba iha riin eletrisidade ne’ebé iha 2018 ba soe hela iha área Hatugau to’o ferujin.
“Kompañia Romantis tenke responsabliza ba riin eletrisidade ne’ebé hodi mai rai estraga no sai ferujin, tamba to’o agora la kontinua hala’o servisu, nune’e difikulta ba komunidade sira moris iha nakukun laran,” nia reforsa.
Entertantu komunidade Nelson Madeira husu ba governu atu tau atensaun ba komunidade ne’ebé hela área rurál.
“Husu ba governu favór tau atensaun mai ami ne’ebé iha área rurál, tamba ami mós presiza moris ho naroman hodi asesu ba liña eletrisidade, nune’e ami nia oan sira bele estuda, tamba ami povu nia votus ne’ebé fó objetivu atu goja ukun aan, maibé realidade ami sai vitima,” dehan Nelson.
Suku Hatugau kompostu husi aldeia neen, hanesan aldeia Hatugau, Kailiti, Sauria, Hunda, Rialaun no Riaheu ne’ebé ho totál populasaun rihun 2.180 no totál xefi familia hamutuk 457.(*)
