Komunidade Railaku 167 Seidauk Simu Cesta Bázika

Komunidade balun ne'ebe simu hela ai-han Cesta Bazika iha Munisipiu Ermera. Foto Tempo Timor

Tempotimor (Ermera)-Maske programa Cesta Bázika ne’ebé governu Timor-Leste aprova liuhusi reuniaun Konsellu Ministru (KM) iha 27 Outubru 2020 bazeia ba planu rekoperasaun ekonómia rai laran, maibé to’o ona fulan hitu, populasaun Timor-Leste ne’ebé iha de’it millaun 1.5 seidauk simu hotu.

Tuir Administradór postu administrativu Railaku, Arlindo dos Santos katak, komunidade postu Railaku hamutuk rihun 14.689, maibé husi númeru ne’e komunidade 167 to’o agora seidauk simu aihan cesta bázika nian.

Read More

“Komunidade rihun 14.522 mak hetan ona aihan cesta bázika ne’ebé fornese husi kompañia Hullino Rovel Unip, Lda hahú (15/02) to’o (01/05), maibé komunidade iha 167 mak sedauk simu, tambe ne’e, iha ona prosesu reklamasaun nune’e bele hetan hotu,” dehan Administradór Arlindo ba www.tempotimor.com liuhusi via telefone, Sesta (7/5).

Administradór ne’e mós dehan, durante iha prosesu distribuisaun aihan cesta bázika la’o ho di’ak no komunidade inklui autoridade lokál sira apresia tebes ba kompañia Hullino Rovel Unip Lda, tamba iha responsabilidade hodi distribui aihan tuir tarjeitu governu nian katak, kada ema hetan folin aihan dollar $50 nian.

Nia mós afirma, komunidade ne’ebé seidauk hetan aihan ne’e, parte autoridade koordena ona ho parte kompañia atu nune’e bele fasilita komunidade aira iha faze tuir mai.

“Ha’u prekupa oitoan ho sira 167 ne’ebè husi suku Lihu sedauk hetan ai-han cesta bázika ne’e, maibé tanba dadus mak komplikadu, entaun ita koordena ona ho kompañia para kontinua fasilita sira iha faze tuir mai,” katak nia.

Enkuantu, postu Railaku kompostu suku sia no aldeia 29 ho totál populasaun hamutuk 14.689.(*)

Related posts