Tempotimor (Ermera)-Komunidade hamutuk 661 iha aldeia Tatoli, suku estadu postu administrativu Ermera, munisípiu Ermera kontente ho programa governu nian, tanba komunidade sira hetan ona ai-han Cesta Bazika husi kompañia distribuidór.
“Nu’udar xefe aldeia, hanesan mós komunidade sente haksolok tebes, mezmu iha situasaun difisíl, maibé governu hadomi duni nia povu liuhusi programa distribui ai-han, nune’e bele fó kbiit naton ba ami hodi han ba loron balun nian iha situasaun Covid-19,” dehan xefi aldeia Tatoli, Bendito Ximenes da Cruz ba www.tempotimor.com iha aldeia Tatoli, Segunda (10/05).
Nia afirma, agradese ba governu no kompañia, tanba dadus ne’ebé husi aldeia relata ba munisípiu depois ba nasional laiha fallansu, nune’e komunidade hotu hetan ona iahan cesta báziku nian.
“Nu’udar autoridade lokál apreseia tebes ba Govenu no kompañia Ótel Kataus ne’ebé responsavél ba distribui aihan mai ami, tanba tuir duni programa ne’ebé iha ho folin $50 no ami nia dadus mós la komplikadu tanba ne’e komunidade sira apresia no agradese ba polítiku governu nian,” katak nia.
Entertantu komunidade Domingas dos Santos mós esprese nia kontente tanba simu ona aihan husi governu.
“Ami kontente loos tanba simu ona hahan, ami sei reza tulun nafatin ba governu ne’ebé lidera husi aman veteranus Taur Matan Ruak, tanba nia ukun mak tempu defisíl no Covid-19 mós ami povu bele hetan aihan, tanba governu ida uluk seidauk iha programa fahe aihan, maibé avo Taur nia ukun povu bele senti duni no simu tan osan $200,” nia akresenta.
Fontes e’e mós husu ba governu atu kontinua programa refere, nune’e povu sira bele sente duni osan ne’ebé husi governu no Parlamentu Nasionál (PN) aprova.
“Programa ne’e tenke kontinua ne’ebé se bele karik fulan ida ami simu hahan, fulan ida ami simu osan, nune’e povu mós senti osan estadu ne’ebé imi aprova liuhusi programa sira hanesan ne’e, la’ós hanesan sira ne’ebé uluk ukun osan fó de’it ba ema ne’ebé bo’ot korupsaun mak senti ami la senti,” dehan Domingas.
Enkuantu komunidade aldeia Tatoli hahú simu aihan cesta bázika husi kompañia Otél Katuas iha loron (2/5) semana kotuk nune’e ohin populasaun hamutuk 661 benefisia hotu ona.(*)
