Tempotimor (Ermera)-Movimentu Kuadru no Rezisténsia Apoiu Xanana (MKRAX) iha munisípiu Ermera prontu apoiu atuál Prezidente Partidu Kongresu Nasionál Rekonstrusaun Timor (CNRT) Kayrala Xanana Gusmão ba prezidente Repúblika Demokrátika Timor-Leste (RDTL) ba periodu 2022-2027.
Tuir portavos MKRAX, Lucas da Concenção Salsinha (Kalohan) hatete, movimentu ne’e mai husi kuadru rezisténsia nian, tamba ne’e prontu apoiu Xanana Gusmão ba prezidente RDTL.
“Ami ne’ebé halibur aan iha movimentu ne’e, hanesan Frenti Armada, Frenti Diplomásia no Frente Klandestina hodi nafatin firme luta ba prinsípiu libertasaun povu nian, tamba ne’e ami husu ba Ermera oan hotu tenki hamutuk iha MKRAX hodi apoiu Xanana Gusmão ba Prezidente RDTL periodu 2022-2027,” dehan Lucas ba www.tempotimor.com iha Monumentu Gleno, Sesta (25/06).
Portavós ne’e afirma, apoiu Xanana ba Prezidente RDTL nu’udar referendu hodi lori povu husi nakukun ba naroman.
“Ita hotu tenki unidade nune’e partisipa iha festa demokrásia nu’udar referendu 1999 hodi hatur hikas estadu RDTL tuir koridór demokrásia liuhusi ita-nia apoiu ba Xanana hodi sai prezidenti RDTL,” nia tenik.
Entertantu reprezentante veteranus, Abilio dos Santos katak, prontu apoiu Xanana Gusmão tamba na’in ba estadu RDTL no veteranu mak Xanana.
“Nu’udar veteranu ha’u apoiu tomak ba Xanana, tamba nia mak fundadór ba RDTL no veteranu, tamba ne’e ami iha espernsa katak Xanana mak sei sai prezidenti laiha tan ema seluk,” nia espresa.
Enkuantu movimentu refere involve husi veteranu hotu iha munisípiu Ermera inklui juventude no funsionáriu balun.(*)
