Tempotimor (Ermera)-Governu liuhusi Ministériu Administrasaun Estatál (MAE) apoiu osan rihun $15 hodi reabilita sede suku Poetete ne’ebé lokaliza iha postu administrativu Ermera vila, munisipiu Ermera.
Xefi suku Poetete, Felisberto das Neves hatete, sede suku refere konstroi kedas iha tempu Indonézia, tamba ne’e hetan ona oportuniadde hodi halo reabilitasaun no programa refere sei kontrolu husi Programa Nasionál ba Dezenvolvimentu Suku (PNDS).
“Sede ne’e iha tempu Indonézia nia tamba haree ba kondisaun komesa aat, nune’e iha 2017 ha’u halo proposta hodi husu ba governu atu apoiu. Grasa Deus governu bele apoiu ona orsamentu rihun $15.000. Entaun sede ne’e sei troka de’it ai, kalén, reboka inklui uza cerámika, tanba orsamentu sufisiénte,” dehan Xefe suku Felisberto ba www.tempotimor.com iha Ermera, Ohin (24/06).
Entertantu servisu na’in Honório dos Santos Amaral kontenti tamba bele hetan kofiansa husi autoridade no governu hodi halo servisu ne’e.
“Ha’u kontenti tebes, tamba bele hetan konfiansa ba servisu ida ne’e, ne’e hanesan onra boot ida mai ami, nune’e ami promete iha responsabilidade másimu to’o servisu remata,” dehan nia.
Enkuantu durasaun ba reabilitasaun sede suku Poetete ne’e durante fulan lima. Eh suku refere kompostu aldeia Poepun, Vila, Likesi, Taklela, Rematu, Gegmara, Urluli, Urletfoho, Loblala, Tidbesi, Biluli no Samatrae ne’ebé ho totál populsaun 11.784.(*)
